2. Letopisa

10 O Rovoam đelo ko Sihem, sose uduri alje sa o Izraelcija te ćhiven le te ovel kralj. 2 Ked šunđa odova o Jerovoam, e Navateso ćhavo, irinđa pe ando Egipat. (O Jerovoam hine ko Egipat sose našlja ando kralj Solomon.) 3 Tegani o manuša đelje palo Jerovoam. Palo odova ov hem o celo Izrael alje ko Rovoam hem phenđe lese: 4 „To dad upro amende ćhivđa but baro pharipe. Ama ako ćereja te ovel amenđe polokhi i služba koja dinđa amenđe hem o pharipe kova ćhivđa upro amende, amen ka služina tuće.“ 5 A ov phenđa olenđe: „Aso trin dive aven palem koro mande.“ Hem o narodo đelo. 6 O kralj Rovoam rodinđa savet ando phure manuša kola služinđe olese dadese, e Solomonese, đi hine đivdo hem pućlja len: „So phenena tumen, so te odgovorinav akale narodose?“ 7 On phenđe olese: „Ako oveja šukar premalo akava narodo hem ako ćereja odova so rodena tutar, on zauvek ka oven te sluge.“ 8 Ama ov na manglja te šunel o savet kova dinđe le o phure manuša hem rodinđa savet ando terne kola barilje oleja hem kola akana hine ki olesi služba. 9 Ov pućlja len: „So phenena tumen, so te odgovorina akale narodose kova phenđa maje: ’Ćer te ovel amenđe polokho o pharipe kova to dad ćhivđa upro amende‘?“ 10 A o terne kola barilje oleja phenđe lese: „E narodose kova phenđa tuće: ’To dad upro amende ćhivđa but baro pharipe, a tu ćer te ovel amenđe polokho‘, ađahar vaćer: ’Mo tikno naj tano pothulo ando me dadeso struko. 11 Mo dad ćhivđa upro tumende but baro pharipe, a me ka ćerav odova pharipe te ovel pana popharo. Mo dad šibinđa tumen e bičencar, a me ka šibinav tumen e bičencar kola posavena.‘ “ 12 Trito dive, o Jerovoam hem celo narodo alje ko Rovoam, sar so phenđa o kralj: „Aven palem koro mande aso trin dive.“ 13 O kralj grubo odgovorinđa lenđe. Ađahar o kralj Rovoam odbacinđa o savet kova dinđe le o phure manuša. 14 Odgovorinđa lenđe sar so sikavđe le o terne manuša: „Ka ćerav tumaro pharipe te ovel pana popharo. Mo dad šibinđa tumen bičencar, a me ka šibinav tumen e bičencar kola posavena.“ 15 O kralj na šunđa e narodo, sose o ćaćutno Devel, o Jehova, manglja sa odova ađahar te ovel, te šaj te ispunini pe okova so phenđa e Navatese ćhavese, e Jerovoamese, prekalo Ahija ando Silom. 16 Ked celo Izrael dikhlja so o kralj na šunđa len, o narodo phenđa lese: „So amen isi amen e Davideja? Amen nane amen o nasledstvo e Jesejese ćhaveja. Đa te devlenđe, Izrael! A tu, David, brinin tut te ćherese!“ Sa o Izrelcija đelje pese ćhere.