Efešanima

5 Odolese, oponašinen e Devle, sar olese mangle ćhave. 2 Živinen ko mangipe, sar o Hrist, kova manglja amen hem pes dinđa amenđe sar prinos hem žrtva, kaso miris tano ugodno e Devlese. 3 O blud hem svako melalipe ja i pohlepa te na pominen pe maškaro tumende, sose ađahar e Devlese sluge hem valjani te ponašinen pe, 4 a isto ađahar, ma ćeren o buća ando kola valjani te lađa, ma vaćeren hem ma šalinen tumen ko nepristojno način, sose odova nane šukar. Umesto odova, zahvalinen e Devlese. 5 Sose hem kokri đanena hem šukar haljona so niko koj tano bludniko ja melalo ja pohlepno – so značini idolopokloniko – nane le nasledstvo ko Hristeso hem e Devleso Kraljevstvo. 6 Neka niko ma te hovavi tumen ćuće lafencar, sose sebepi sa odova e Devlesi holi avela upro okola kola na šunena. 7 Odolese ma te ovel tumen ništa olencar. 8 Angleder, hijen le ki tama, a akana hijen ki svetlost sose hijen ko jekhipe e Gospodeja. Živinen sar o ćhave andi svetlost, 9 sose o plod andi svetlost bijani svako vrsta ando šukaripe, andi pravednost hem ando ćaćipe. 10 Hem ponodri ispitinen kola buća tane šukar anglo Gospodese jaćha. 15 Odolese pazinen sar živinena, ma živinen sar okola so nane mudra, nego sar okola soj tane mudra. 16 Mudro koristinen o vreme, sose o dive tane lošna. 17 Odolese ma oven više nerazumna, nego trudinen tumen te haljon soj tani e Jehovasi volja. 18 Ma maćoven vinoja, sose odova šaj te legari tumen te ćeren but lošna buća, nego ispuninen tumen sveto duhoja. 19 Zorjaćeren jekh jekhe ađahar so ka đilaben psalmija, hvale e Devlese hem duhovna đilja. Kotar vilo đilaben e Jehovase hem điljaja hvalinen le. 20 Aso sa uvek zahvalinen amare Devlese hem Dadese ko anav ando amaro Gospod o Isus Hrist. 22 O romnja nek oven podložna pe romenđe sar soj tane podložna hem e Gospodese, 23 sose o rom tano poglavari e romnjaće sar soj tano o Hrist poglavari e skupštinaće, koja tani oleso telo hem kaso tano ov spasitelj. 24 U stvari, sar soj tani i skupština podložno e Hristese, ađahar hem o romnja nek oven podložna pe romenđe ko sa. 25 Romalen, mangen tumare romnjen, sar so o Hrist manglja e skupština hem dinđa po đivdipe olaće, 26 te šaj te posvetini la, te čistini la ađahar so nanđari la e panjeja, ko Devleso Lafi, 27 Odova ćerđa te šaj i skupština te sjajini anglo olese jaćha. Ov manglja i skupština te ovel sveto hem bizi mana. 28 Ađahar hem o roma valjani te mangen pe romnjen sar po telo. Ko mangela pe romnja, mangela kokri pes. 29 Sose niko na mrzini poklo telo, nego parvari le hem brinini pe olestar, sar o Hrist andi skupština. 33 Odolese, nek svako tumendar mangela pe romnja sar kokri pes, a i romni nek hor poštujini pe rome.