2. Letopisa
29 O Jezekija hine le 25 berš ked ulo kralj hem vladinđa 29 berš ko Jerusalim. Olesi daj vićinđa pe Avija hem hine e Zaharijasi ćhaj. 2 Ov ćerđa okova soj tano ispravno anglo Jehovase jaćha, sar so angleder ćerđa hem oleso rođak o David. 3 Prvo berš đi vladinđa, prvo masek, phravđa o udara ando Jehovaso ćher hem popravinđa len. 4 Palo odova anđa e sveštenikonen hem e Leviten hem ćedinđa len ko trg, ki istočno strana andi diz. 5 Tegani phenđa lenđe: „Tumen kola hijen Levitija, šunen so isi man te phenav tumenđe! Akana posvetinen tumen hem posvetinen o ćher ando Jehova, o Devel ando tumare paradada, hem ikaljen ando sveto than sa soj tano melalo. 6 Amare dada na hine verna hem ćerđe okova soj tano lošno anglo Jehova, amaro Devel. On aćhavđe e Jehova hem irinđe po muj ando than kaj ov živini. Irinđe po dumo e Devlese. 25 O Jezekija đi tegani već ćhivđa ko Jehovaso ćher e Leviten e činelencar, e lirencar hem e harfencar, sar so zapovedinđe o David, e kraljeso videlac o Gad hem o prorok Natan, sose o Jehova dinđa odija zapovest prekalo pe prorokija.