Jov
2 Palem alo o dive ked o ćhave ando ćaćutno Devel alje anglo Jehova. Maškaro okola so ćedinđe pe anglo Jehova hine hem o Satana. 2 O Jehova tegani pućlja e Satana: „Kotar aveja?“ A o Satana phenđa e Jehovase: „Nakhljum i phuv hem dikhljum.“ 3 O Jehova phenđa e Satanase: „Dikhljan li me sluga e Jove? Nane nijekh manuš sar oleste. Ov tano pravedno manuš hem verno ko sa, darala ando Devel hem cidela pe ando lošnipe. Hem palem aćhola maje verno, mada tu mangeja te ćhive man te irinav man protiv oleste hem te uništinav le bizo razlog.“ 4 O Satana phenđa e Jehovase: „Koža asi koža! Sa so isi le o manuš ka del aso po životi. 5 Odolese akana pružin to vas hem pipin olese kokala hem oleso mas, hem ka dikhe so ka vaćeri lošna buća tutar.“ 6 Tegani o Jehova phenđa e Satanase: „Ko te vasta tano! Samo ma le olesi duša!“ 7 Ađahar o Satana đelo ando Jehova hem ćerđa te ikljon e Jovese ando šero đi o pro čirija kola but dukhana. 8 A o Jov lelja jekh kotor ando phago phuvjalo ćaro te harovi pe oleja hem bešlja ko praho. 9 Tegani olesi romni phenđa lese: „Pana li ka aćhove verno e Devlese? Akoš e Devle hem mer!“ 10 Ama, ov phenđa laće: „Vaćereja sar jekh dilini romni. Da li ando ćaćutno Devel valjani te primina samo o šukaripe, a o lošnipe te na primina? Ko sa odova so nakhlja, o Jov na grešinđa pe lafencar.