2. Letopisa

14 O Avija mulo hem parunđe le ki Davidesi diz. Palo oleste počminđa te vladini oleso ćhavo o Asa. Ko oleso vreme i phuv hine ko rahati deš berš. 2 O Asa ćerđa odova soj tano šukar hem ispravno anglo Jehovase jaćha, kova hine oleso Devel. 3 Uništinđa o oltarija ando avera devela hem o sveta thana, phaglja o stubija aso obožavanje hem ćhinđa o sveta kašta. 4 Zapovedinđa e Judejcenđe te roden e Jehova, e Devle ando pe dada, hem te ićeren pe ko Zakoni hem ko zapovestija. 6 Ov ćerđa utvrdime dizja ki Juda, sose hine mir ki phuv. Odola berša niko na ratujinđa protiv oleste, sose o Jehova dinđa le mir. 7 Odolese e narodose andi Juda phenđa: „Hajde te ćera odola dizja hem okolo lende te vazda o zidija hem o kule upro lende, e dizjake udara hem o prevornice. Sose i phuv tani pana amari, sose služinđam e Jehovase, amare Devlese. Služinđam lese hem ov dinđa amen mir ko sa amare granice.“ Ađahar ćerđe hem hine uspešna. 9 O Zara Etiopljanin alo te borini pe protiv olende hem hine le vojska ando 1 000 000 manuša hem 300 kočije. Ked alo đi i Marisa, 10 o Asa pođinđa ko maribe protiv oleste. Redinđe pe ki dolina Sefata uzi Marisa. 11 O Asa rovindoj molinđa pe e Jehovase, pe Devlese, hem phenđa: „Jehova, tu šaj te pomožine e narodose kova tano zoralo, ama hem e narodose kova nane zoralo. Pomožin amenđe, Jehova, Devla amaro, sose upro tute uzdajinaja amen hem ko to anav pođinđam protiv akija bari vojska. Jehova, tu hijan amaro Devel, ma dozvolin jekh obično manuš te ovel pozoralo tutar.“ 12 Ađahar o Jehova pobedinđa e Etiopljaninen anglo Asa hem anglo Judejcija hem o Etiopljanija našlje. 13 O Asa hem o manuša kola hine oleja đelje palo lende sa đi o Gerar. On borinđe pe olencar sa đi na aćhilo nijekh Etiopljanin. Ađahar o Jehova hem olesi vojska potpuno pobedinđe len. Palo odova, o Judejcija lelje olendar but buća.