1. Kraljevima

6 Tegani o kralj phenđa e slugase ando ćaćutno Devel: „Molinava tut, molin e Jehova, te Devle, te mothovi maje milost hem molin tut maje te saćol mo vas.“ Tegani e Devleso sluga molinđa pe e Jehovase te mothovi lese milost hem e kraljeso vas saćilo hem hine sar angleder. 7 O kralj phenđa e Devlese slugase: „Ava mancar ćhere te ha diso hem ka dav tut poklon.“ 8 Ama e Devleso sluga odgovorinđa e kraljese: „Te de man hem ekvaš ando to barvalipe, na bi pođinava tuvaja niti bi hava maro niti bi pijava pani ko akava than. 9 Sose ađahar zapovedinđa manđe o Jehova: ’Ma ha maro hem ma pi pani niti ma irin tut drumoja koleja aljan.‘ “ 10 Ađahar đelo avere drumoja hem na irinđa pe drumoja koleja alo ko Vetilj. 14 Đelo palo e Devleso sluga hem arakhlja le sar bešela talo jekh baro kaš. Tegani pućlja le: „Da li hijan tu e Devleso sluga kova alo andi Juda?“ A ov phenđa: „Ja, me hijum.“ 15 Ov phenđa lese: „Ava mancar ćhere te ha hari maro.“ 16 Ama ov odgovorinđa: „Našti te irinav man tuvaja niti te khuvav ko to ćher. Na isminava te hav maro tuvaja niti te pijav pani ko akava than. 17 Sose o Jehova zapovedinđa manđe: ’Ma ha maro hem ma pi pani uduri hem ma irin tut drumoja koleja aljan.‘ “ 18 Ov ko odova phenđa lese: „Hem me hijum proroko sar tu, hem o anđeo vaćerđa manđe e Jehovasi zapovest: ’Ana le koro tute ćhere te hal maro hem te pijel pani.‘ “ (Ov hovavđa le.) 19 Ađahar e Devleso sluga irinđa pe oleja te hal hem te pijel ko oleso ćher. 20 Đi bešlje ko astali, e Jehovaso lafi alo e prorokose kova anđa le koro peste. 21 Tegani ov e Devlese slugase andi Juda phenđa: „Ađahar phenela o Jehova: ’Sebepi so na šunđan e Jehova hem na ićerđan tut ki zapovest so dinđa tut o Jehova, to Devel, 22 nego irinđan tut akari te ha maro hem te pije pani iako hine tuće phendo: „Ma ha maro hem ma pi pani“, to trupo na ka ovel parumo ko grobo ando te pretkija.‘ “