Jovan

11 I Marija aćhili uzo grobo hem runđa. Ađahar rovindoj, oj dikhlja ko grobo. 12 Andre dikhlja duje anđelen ko parne šeja. Bešlje odothe kuri hine e Isuseso telo, jekh kaj hine oleso šero, a aver kaj hine olese pre. 13 On pućlje la: „Sose roveja?“ Oj odgovorinđa lenđe: „Legarđe me Gospode hem na đanava kaj tano akana.“ 14 Ked phenđa odova, irinđa pe hem dikhlja so neko terđola palo late. Odova hine o Isus, ama oj na penđarđa le. 15 O Isus pućlja la: „Sose roveja? Kas rodeja?“ I Marija mislinđa soj tano ov o baštovani hem phenđa lese: „Molinava tut, ako tu legarđan oleso telo, phen maje kaj tano hem me ka lav le.“ 16 Tegani o Isus phenđa laće: „Marija!“ Oj ko odova irinđa pe hem ko hebrejski phenđa lese: „Raboni!“ (so značini „učitelj“) 17 O Isus phenđa laće: „Ma ićer man, sose pana na ka đav ko mo Dad. Đa ko me phralja hem phen lenđe: ’Đava ko mo Dad hem ko tumaro Dad, ko mo Devel hem ko tumaro Devel.‘ “ 18 Ađahar i Marija Magdalena đelji hem javinđa e učenikonenđe: „Dikhljum e Gospode!“ Hem vaćerđa lenđe sa so phenđa laće. 21 O Isus palem phenđa lenđe: „Nek ovel tumen mir! Sar so o Dad bićhalđa man, ađahar hem me bićhalava tumen.“ 28 O Toma ko odova vačerdža oljese: „Mo Gospod hem mo Devel!“ 31 A akala tane pisime te bi verujinena soj tano o Isus ćaće Hrist, e Devleso Ćhavo, hem te šaj sebepi odija vera te dobinen o životi prekalo oleso anav.