Otkrivenje

14 Tegani dikhljum e Bakre sar terđola ki gora Sion hem oleja o 144 000 okola kola isi len oleso anav hem olese Dadeso anav pisimo ko ćekat. 2 Šunđum o zvuk kotar nebo kova hine sar ked šunđona but panja hem sar ked šunđola o zoralo grom. O zvuk kova šunđum hine sar muzika ando okola kola đilabena hem bašalena ko pe harfe. 3 Đilabđe diso so dićhilo sar nevi đili, hem terdilje anglo presto, anglo štar bića hem anglo starešine. Hem niko naštine te sikljol odija đili osim odola 144 000, kola tane ćinde kotar phuv. 4 On tane okola kola na meljaćerđe pe e đuvlencar, kola arakhlje pi nevinost. On đana palo Bakro kuri god ov đala. On tane ćinde kotar manuša sar prvine e Devlese hem e Bakrese 6 Hem dikhljum jekhe avere anđele sar letini ko nebo hem legari i večno šukar vest te phenel la okolenđe kola živinena ki phuv – ­svakona nacijaće, svakone plemese, svakona ćhibjaće hem svakone narodose. 7 Ov vaćerđa zorale glasoja: „Daran ando Devel hem slavinen le, sose alo o vreme te sudini e manušenđe! Pokloninen tumen e Stvoriteljese ando nebo hem andi phuv, ando more hem ando izvorija kotar pani!“