Psalam

72 Devla, pomožin e kraljese te sudini sar tute, de le te ovel pravedno sar tu so hijan. 2 Nek sudini pravedno te narodose hem e ponizno manušenđe. 3 Nek o planine anena mir te narodose, a o bregija pravda. 4 Nek branini e ponizno manušen ando narodo, nek spasini e ćororenge ćhaven hem nek zaštitini len ando okova kova mučini len. 5 On ka daran tutar, Devla, sa đi tano o kham hem o mesec, andi generacija ki generacija. 6 O kralj ka ovel sar o boršim kova perela ki kosimi ćar, sar baro boršim kova topini i phuv. 7 Ko dive ked ov ka vladini ka niconen o pravednikija, ki celo phuv ka vladini o mir sa đi ka ovel o mesec. 8 Ka vladini ando more ko more hem ando Eufrat đi o najdur thana ki phuv. 11 Sa o kraljija ka klaninen pe anglo oleste đi ki phuv, ka služinen lese sa o narodija. 12 Sose ov ka izbavini e ćororen kola rodena lestar pomoć, e ponizno manušen hem sa okolen kola nane len nikas te pomožini len. 13 Ka sažalini pe upro jadna hem upro ćorore, ka arakhi o đivdipe e ćororengo. 14 Ka izbavini len ando manuša kola mangena te povredinen len hem kola mučinena len, olengo rat ka ovel vredno anglo olese jaćha. 16 Ki phuv ka ovel pherdo điv hem o najuće bregija ka oven pherde điveja. E kraljese poljija ka barjon sar o kašta ko Livan, a o manuša ko dizja ka cvetonen sar i ćar ki phuv. 18 Nek ovel hvalimo o Jehova o Devel, e Izraeleso Devel, o jedino kova ćerela čudesna delija. 19 Nek ovel hvalimo oleso slavno anav ki celo večnost, nek olesi slava pherela celo phuv. Amin, amin.