Levitska
2 „Vaćer sa e Izraelcenđe: ’Oven sveta sose me o Jehova, tumaro Devel, hijum sveto. 3 Svako nek poštujini pe daja hem pe dade. Ićeren me sabatija. Me hijum o Jehova, tumaro Devel. 4 Ma roden pomoć ando hovavne devela hem ma ćeren tumenđe idolija. Me hijum o Jehova, tumaro Devel. 8 O manuš kova halja andi odija žrtva ka odgovorini aso po greh, sose meljećerđa odova soj tano sveto e Jehovase. Valjani te ovel mudardo hem ađahar te ovel cidimo ando po narodo. 11 „’Ma ćoren, ma hovaven hem ma prevarinen jekh jekhe. 12 Ma den sovel ko mo anav ked hovavena hem ađahar te meljaćeren tumare Devleso anav. Me hijum o Jehova. 13 Ma prevarin te pašutne hem ma le odova so nane toklo. E radnikosi plata ma ićer koro tute prekali rat, sa đi sabale. 14 Ma de arman e kašuke manuše hem ma ćhiv anglo kororo manuš diso te perel. Nek ovel tut dar anglo to Devel. Me hijum o Jehova. 15 Ked sudineja, ma ov nepravedno. Ma ov milosrdno premalo nekaste samo sebepi soj tano ćororo hem ma ov ki barvalengi strana. Pravedno sudin te pašutnese. 16 „’Ma vaćer o hovajba kola šaj te ruminen nekaso šukar anav. Ma ćer o buća sebepi kola to pašutno šaj te merel. Me hijum o Jehova. 17 „’Ma mrzin te phrale. Ma bezdin tut te ukorine te pašutne te na ove krivo zajedno oleja aso greh. 18 „’Ma irin o lošnipe hem ma ićer holi. Mang te pašutne sar kokri tut. Me hijum o Jehova. 19 „’Ićeren tumen ko me smernice: Ma spojin o duj različita vrste kotar domaća životinje. Ma sejin ki ti njiva duj različita vrste ando seme hem ma akhar o šeja kola tane ćerde ando duj različita materijalija. 23 Ked khuvena ki disavi phuv koja dava tumenđe hem ked ka sadinen othe dijekh voćka, dikhen ko olake plodija sar melale hem zabranime. Trin berš ma te han len hem dikhen len sar zabranime. 24 Ko štarto berš celo olako plod ka ovel sveto hem tumen bahtalipaja ka ćhiven le anglo Jehova. 25 Ko panđto berš šaj te han olake plodija hem tegani pana poviše plodija ka ćeden. Me hijum o Jehova, tumaro Devel 28 „’Ma ćhinen tumen ko telo ked žalinena nekase so mulo hem ma ćeren tetovaže ki tumari koža. Me hijum o Jehova. 31 „’Ma roden pomoć okolendar kola phenena so vaćerena e mulencar, hem ma roden savet okolendar kola phenena so đanena so ka ovel ki budućnost te na oven melale sebepi olengo. Me hijum o Jehova, tumaro Devel. 33 „’Ako jekh stranco živini tumencar ki tumari phuv, ma oven lošna premalo leste. 34 O stranco kova živini maškaro tumende nek ovel tumenđe sar o manuš kova bijandilo sar Izraelco. Mangen le sar kokri tumen, sose hem tumen hijen le strancija ko Egipat. Me hijum o Jehova, tumaro Devel. 35 „’Ma koristinen hovavne mere ked merinena diso kobor tano baro, pharo ja kobor than lela. 36 Valjani te ovel tumen tačno vaga, tačna tegija hem tačna mere. Me hijum o Jehova, tumaro Devel, kova ikalđa tumen ando Egipat.