Izlazak
3 O Mojsije arakhlja o stado ando po sastro o Jotor, kova hine madijansko svešteniko. Đi legarđa o stado premalo zapadno deo ki pustinja, ko krajo reslja đi i gora ando pravo Devel, ko Horiv. 2 Tegani pojavinđa pe lese e Jehovaso anđeo ki jag koja hine thabljola ko jekh grm. O Mojsije dikhlja so ko grm isi jag, ama nisar na thabljola. 3 Odolese phenđa: „Ka đav hari popaše te šaj pošukar te dikhav so desini pe, sose o grm na thabljola.“ 4 Ked o Jehova dikhlja so o Mojsije avela popaše, vićinđa le ando grm: „Mojsije! Mojsije!“, a ov odgovorinđa lese: „Othe hijum.“ 5 O Devel tegani phenđa lese: „Ma ava popaše. Huljav o sandale ando pre, odolese so terđoveja ki sveto phuv.“ 6 Palo odova phenđa: „Me hijum te dadeso Devel, e Avrahameso Devel, e Isakeso Devel hem e Jakoveso Devel.“ Tegani o Mojsije ućharđa po muj, sose darandilo te dikhel e ćaćutne Devle. 7 O Jehova pana phenđa: „Dikhljum me narodose muke ko Egipat, šunđum so rovena sose valjani lenđe pomoć sebepi okola kola ćhivena len te ćeren buti hem šukar đanava olenge dukha kola isi len. 8 Odolese me huljiljum te spasinav len ando egipćanenge vasta hem te ikalav len andi odija phuv hem te legarav len ki šukar hem bari phuv, ki phuv kaj thavdela o avđin hem o thud, uduri kaj živinena o Hanancija, o Heteja, o Amoreja, o Ferezeja, o Jeveja hem o Jevuseja. 9 Šunđum e Izraelconengo rojbe hem dikhljum sar o Egipćanija maltretirinena len. 10 Đa akana, bićhalava tut ko faraon te ikale me narodo, e Izraelconen, ando Egipat. 14 Tegani o Devel phenđa e Mojsijese: „Ka ovav sa so mangava te ovav.“ Hem pana phenđa: „Ađahar vaćer e Izraelcenđe: ‘„Ka ovav“ bićhalđa man koro tumende.’“ 15 Tegani o Devel pana jekh puti phenđa e Mojsijese: „Ađahar vaćer e Izraelcenđe: ‘O Jehova, o Devel tumare dadengo, o Devel e Avrahameso, o Devel e Isakeso hem o Devel e Jakoveso, bićhalđa man koro tumende.’ Akava tano mo anav zauvek hem ađahar ka ovav penđardo andi generacija ki generacija.