2. Samuilova

15 O Jehova mukhlja o nabormipe ko Izrael ando sabaj đi o vreme kova ov odredinđa hem ađahar 70000 manuša mulje kotar Dan đi i Virsaveja. 16 Ked o anđeo pružinđa po vas premalo Jerusalim te mudari olese manušen, e Jehovase hine žao sebepi i nevolja koja ćerđa e manušenđe hem tegani phenđa e anđelese kova mudarđa len: „Ma više! Mukh akana to vas.“ E Jehovaso anđeo hine ko gumno ando Orna Jevusejin. 17 Ked o David dikhlja e anđele kova mudarđa e manušen, phenđa e Jehovase: „Me grešinđum hem me ćerđum lošnipe. Ama so ćerđa akava narodo? Molinava tut, nek avel to vas upro mande hem upro me dadeso ćher.“ 18 Isto odova dive, o Gad alo ko David hem phenđa lese: „Đa hem ćer oltar e Jehovase ko gumno ando Orna Jevusejin.“ 21 O Orna pućlja: „Sose mo gospodari, o kraljo, alo ko po sluga?“ A o David phenđa: „Te ćinav tutar o gumno hem koro leste te ćerav oltar e Jehovase, te ćhinavđol o nabormipe ko narodo.“ 22 Tegani o Orna phenđa e Davidese: „Nek lel le mo gospodari, o kraljo, hem nek del sar žrtva sa so mangela. Aće o guruv asi žrtva paljenica, a e kaštenđe le vršalica, plug hem jaram. 23 Sa odova, mo kraljo, me dava tut.“ Palo odova, o Orna phenđa e kraljese: „Nek blagoslovini tut o Jehova, to Devel.“ 24 Ama o kralj phenđa e Ornase: „Na, mangava odova te ćinav tutar. Na mangava te dav e Jehovase, me Devlese, žrtve paljenice kola ništa na koštinena man.“ Ađahar o David ćhinđa gumno hem guruva aso 50 siklija ando srebro. 25 O David odothe ćerđa o oltar e Jehovase hem dinđa lese žrtve paljenice hem žrtve zajedništva. Tegani o Jehova šunđa o molitve ando vilo asi phuv hem ćhinavdilo o nabormipe ko Izrael.