Luka

6 Na biknena pe li duj vrapcija aso duj novčićija? Ipak, o Devel na bistrela nijekhe olendar. 7 A tumenđe tane hem sa o bala ko šero đende. Ma daran, tumen hijen povredna ando but vrapcija. 15 Palo odova phenđa lenđe: „Oven oprezna hem arakhen tumen kotar svako vrsta ando lakomstvo, sose čak ked neko isi le but, oleso životi na zavisini odolestar so isi le.“ 16 Tegani vaćerđa lenđe jekh poređenje: „Jekhe barvale manušese i phuv šukar bijanđa, 17 hem odolese pućlja pe: ’So te ćerav? Nane man kaj te ćedav sa so i phuv bijanđa.‘ 18 Hem phenđa: ’Aće, so ka ćerav: ka peravav o žitnice hem ka ćerav pana pobare hem uduri ka ćhivav sa o điv hem sa so isi man. 19 Hem ka phenav kokri maje: „Isi tut but šukar buća aso but berša. Odmorin tut, ha, pi, uživin.“ 20 Ama, o Devel phenđa lese: ’Tu kova hijan bigođako, akija rat ka mere. Tegani kaso ka ovel sa akava so ćedinđan?‘ 21 Ađahar nakhela okova ko ćedela pese barvalipe, a nane barvalo anglo Devel.“ 24 Dikhen o gavranija – on na sejinena ni na ćedena, nane len skladišta ni ambarija, ama palem o Devel dela len te han. Na vredinena li tumen but poviše ando ćiriklja? 27 Dikhen o ljiljanija sar barjona. Na mučinena pe ni na sivena pe šeja, ama me phenava tumenđe so ni o Solomon, o najbarvalo manuš, na hine uravdo sar soj tane on. 28 Ako o Devel ađahar uravi o poljsko bilje, kova tano avdije ko polje, a tajsa fordela pe ki jag, na ka uravi li poviše tumen, so isi tumen hari vera! 29 Ma sikirinen tumen so ka han hem so ka pijen hem ma brininen tumen odolese! 30 Sose sa odole bućencar tane zaokupime o manuša ando avera narodija, ama tumaro nebesko Dad đanela so sa odova valjani tumenđe. 31 Nego, roden oleso Kraljevstvo, a o Devel ka del tumen avera buća. 32 Ma daran, tumen o tikno stado, sose tumaro Dad mangela te del tumen o Kraljevstvo. 34 Sose kaj tano tumaro barvalipe, uduri ka ovel hem tumaro vilo. 40 Ađahar hem tumen oven spremna, sose o manušikano Ćhavo ka avel ko vreme ked na nadinena tumen. 42 A o Gospod odgovorinđa: „Koj tano o verno hem o razborito nastojniko kas oleso gospodari ka ćhivel upro pe sluge te del len hrana ko pravo vreme? 47 Tegani odova robo kova haljilo soj tani olesi gospodaresi volja, ama na pripreminđa pe aso odova so ov ka avel niti ćerđa odova so oleso gospodari rodinđa, ka dobini but udarcija. 48 A o robo kova odova na haljilo, pa ćerđa diso sovaja zaslužini o udarcija, ka dobini len hari. Svakonestar kase tano but dindo, but ka rodel pe. Kase tano but poverimo, olestar but ka rodel pe. 49 „Aljum te tharav i jag ki phuv hem ked već tharđum la, so pana te mangav? 50 Sose ađićeri man jekh krštenje hem but maje pharo đi odova na završini pe. 51 Mislinena li so aljum te anav mir ki phuv? Na, phenava tumenđe, nego aljum te odvojinav e manušen. 52 Sose ando akana panđ đene ko jekh ćher ka oven odvojime: trin protiv duj hem duj protiv trin. 53 O dad ka ovel protiv o ćhavo hem o ćhavo protiv o dad, i daj protiv i ćhaj hem i ćhaj protiv i daj, i sasuj protiv i bori hem i bori protiv i sasuj.“