Postanak

6 Palo disavo vreme, o glasnikija irinđe pe ko Jakov hem phenđe: „Hijam le ko to phral, o Isav, hem ov avela anglo tute 400 manušencar.“ 7 O Jakov but darandilo hem brininđa pe. Odolese e manušen kola hine oleja, e bakren, e gurumnjen hem e kamilen ćhivđa ko duj grupe. 8 Ov razmislinđa: „Ako o Isav napadini i prvo grupa, i dujto ka našel.“ 9 Palo odova o Jakov phenđa: „Jehova, tu kova hijan Devel ando mo dad, o Avraham, hem o Devel ando mo dad, o Isak, tu kova pheneja maje: ’Irin tut ki ti phuv hem ki ti familija hem me ka ćerav tuće šukaripe‘, 10 na zaslužinava te mothove maje to mangipe hem ti vernost, sose hine man samo ranik ked nakhljum o Jordan, a akana tano moklo sa soj tano ko akala duj grupe. 11 Molinava tut, arakh man ando mo phral, o Isav, sose darava so ka napadini man, e romnjen hem e ćhaven. 12 A tu phenđan maje: ’Ćaće ka ćerav tuće šukaripe hem ka ćerav to potomstvo te ovel odobor baro so našti te đenel pe sar i pošik ki obala ando more.‘ “