Isaija

55 Sare tumen kola hijen trošale, aven te pijen o pani! Aven, tumen kola nane tumen pare, len hem han. Aven hem biparengo len o vino hem o thud. 2 Sose te trošinen tumare pare ko odova so nane maro hem sose te trošinen tumari plata ko odova so na ćaljari? Pažljivo šunen man hem han o habe kova tano šukar hem ka uživinen ko najšukar habe. 3 Šunen hem aven koro mande. Šunen, hem ka živinen hem ka ćerav tumencar trajno savez, sose e Davidese obećinđum so ka mothovav lese verno mangipe, a mo obećanje tano pouzdano. 4 Aće, ćhivđum le aso svedoko e narodonđe, aso vođa hem zapovedniko e narodonđe. 6 Roden e Jehova đi pana šaj te arakhen le. Vićinen le đi pana tano paše. 7 Nek o lošno manuš aćhavi po drumo hem pe mislija. Nek irini pe e Jehovase, amare Devlese, kova ka smilujini pe olese, sose ov spremno ka oprostini lese. 8 „Sose me mislija nane tumare mislija, hem tumare drumija nane me drumija“, phenela o Jehova. 9 „Kobor tane o nebesija pouće andi phuv, odobor tane me drumija pouće ando tumare drumija hem me mislija ando tumare mislija. 10 Sar so o boršim hem o iv perena kotar nebo hem na irinena pe sa đi na topinena i phuv hem na ćerena la te bijani, te ovel zeleno hem te del seme okolese kova sejini hem maro okolese kova hala, 11 ađahar ka ispunini pe hem mo lafi kova ikljola ando mo muj. Na ka irini pe maje ćućo, nego ka ćerel odova so mangava hem ka ćerel odova aso so bićhalđum le.