Jovan

2 Palo duj dive, hine bijav ki Kana Galilejsko. Ko odova bijav hine hem e Isusesi daj. 2 Isto ađahar, o Isus hem olese učenikija hine vićime ko odova bijav. 3 Ked više na hine vino, e Isusesi daj phenđa lese: „Nane len više vino.“ 4 O Isus phenđa pe dajaće: „Sose amen duj valjani te brinina amen odolestar? Mo vreme pana na alo.“ 5 Ko odova olesi daj phenđa okolenđe kola služinđe: „Ćeren sa so ka phenel tumenđe.“ 6 Odothe hine šov khore ando bar aso pani kola o Judejcija koristinđe ked thovđe pe vasta angleder te han maro. Ko svako khoro šaj hine te resel oko 44 đi ko 66 litre. 7 O Isus phenđa lenđe: „Pheren o khore panjeja.“ Hem pherđe len đi ko muj. 8 Palo odova phenđa lenđe: „Len hari hem den e domaćinese ando bijav.“ Hem on legarđe lese. 9 O domaćini ando bijav probinđa o pani kova hine pretvorimo ko vino, ama na đanđa kotar tano (o sluge kola pherđe o pani đanđe kotar tano). Tegani vićinđa e đamutre 10 hem phenđa lese: „Avera najangleder ikalena šukar vino, a ked o manuša maćona, ikalena okova so nane odobor šukar. A tu garavđan akava šužo vino sa đi akana.“ 11 Ađahar, o Isus ki Kana Galilejsko ćerđa po prvo čudo hem mothovđa pi moć. Hem olese učenikija počminđe te verujinen ano leste. 12 Palo odova, pe dajaja, pe phralencar hem pe učenikonencar đelo ko Kapernaum. Uduri aćhilje samo nekobor dive. 13 Alo paše o dive andi judejsko Pasha hem o Isus đelo ko Jerusalim. 14 Ko hram arakhlja okolen so biknena guruven, bakren hem goluben hem okolen so bešlje uduri te meninen o pare. 15 Ćerđa pese bič ando šele, pa uspudinđa ando hrami olen, e bakren hem e guruven, a okolenđe kola meninena o pare fordinđa lendar sa hem irinđa olenge astalija. 16 Hem phenđa okolenđe kola bikinđe goluben: „Ciden odova akatar! Ćhinaven te biknen ko me Dadeso ćher!“ 17 Olese učenikija setinđe pe so hine pisimo: „I revnost aso to ćher ka thabljol ano mande.“ 18 Tegani o Judejcija phenđe lese: „Mothov amenđe disavo znak te dikha so isi tut pravo te ćere odova.“ 19 O Isus ko odova phenđa lenđe: „Rušinen akava hram, a me ka ćerav le aso trin dive.“ 20 A o Judejcija phenđe: „Akava hram tano ćerdo 46 berš, a tu ka ćere le aso trin dive?“ 21 Ama o hram ando kova vaćerđa hine oleso telo. 22 Ked o Isus uštilo ando mule, olese učenikija setinđe pe ko odola lafija hem počminđe te verujinen ko okova so pisini ko Lil hem ko olese lafija. 23 A ked ko praznik andi Pasha hine ko Jerusalim, but manuša počminđe te verujinen ano leste ked dikhlje o čudija kola ćerđa. 24 Ama o Isus na hine le poverenje upro lende sose đanđa save tane 25 hem niko na valjanđa te vaćeri lese diso ando manuš, sose ov đanđa soj tano e manušese ko vilo.