1. Kraljevima

5 Ko Gavaon o Jehova alo e Solomonese raćate ko suno. O Devel phenđa lese: „Vaćer maje so mangeja te dav tut.“ 7 Hem akana, Jehova, mo Devel, tu te sluga ćhivđan sar kralj ko than me dadeso e Davideso, a me hijum terno hem pana nane man iskustvo. 8 To sluga vladini upro to narodo kova tu birinđan, o narodo kova tano odobor baro so našti te đenel pe. 9 Odolese de te slugase vilo kova šunela te šaj te sudini te narodose hem te razlikujini o šukar ando lošno, sose ko šaj te sudini akale bare narodose?“ 10 E Jehovaso vilo hine pherdo so rodinđa olestar odova o Solomon. 11 O Devel tegani phenđa lese: „Sebepi so na rodinđan te živine dugo ni te ove barvalo ni te meren te dušmanija, nego rodinđan te haljove šukar sa o buća te šaj ispravno te sudine, 12 ka dav tut odova so rodinđan. Ka dav tut mudro hem razumno vilo, te ove manuš savo na hine angleder tute, a na ka ovel ni palo tute. 13 A ka dav tut hem okova so na rodinđan – te ove barvalo hem penđardo – ađahar sa đi hijan đivdo na ka ovel asavko kralj sar so hijan tu.