1. Kraljevima

11 O kralj Solomon osim e faraonese ćhaja manglja hem avere romnjen: e Moavken, e Amonken, e Edomken, e Sidonken hem e Hetejken. 2 On hine ando narodo aso kova o Jehova phenđa e Izraelcenđe: „Ma đan koro lende hem on ma te aven koro tumende. On sigurno ka ćhiven tumen te služinen avere devlenđe.“ Ama o Solomon hine but paše olencar hem manglja len. 3 Ov hine le 700 romnja, kneginje, hem 300 inoče, hem olese romnja legarđe le ko pogrešno drumo. 4 Ked o Solomon phurilo, olese romnja ćhivđe le te služini avere devlenđe, hem više na hine celone vileja verno e Jehovase, pe Devlese, sar so hine oleso dad o David. 5 O Solomon počminđa te služini e Astarotaće, kase služinđe o Sidoncija, hem e Melhomese, e odvratno devlese kase služinđe o Amoncija. 6 O Solomon ćerđa okova soj tano lošno anglo e Jehovase jaćha hem na šunđa e Jehova ko sa sar oleso dad o David. 9 O Jehova holjanđa upro Solomon sose durilo ando Jehova, e Izraeleso Devel, kova pojavinđa pe lese duj putija 10 hem kova zapovedinđa lese te na služini avere devlenđe. Ama o Solomon na šunđa okova so zapovedinđa lese o Jehova. 43 Palo odova o Solomon mulo hem hine parumo ki diz ando po dad o David. Palo leste počminđa te vladini oleso ćhavo o Rovoam.