Dela apostolska
27 Ađahar legarđe len anglo Sinedrion, a o prvosveštenik počminđa te ispitini len. 28 Phenđa lenđe: „Strogo naredinđam tumenđe te na sikaven ando odova anav, a tumen pherđen o Jerusalim odoleja so sikavena hem mangena te okrivinen amen aso odole manušeso meribe.“ 29 O Petar hem avera apostolija ko odova vaćerđe: „E Devle sar vladare mora te šuna, a na e manušen.“ 30 O Devel ando amare phure uskrsninđa e Isuse, kas tumen mudarđen ađahar so kovinđen le ko stubo. 31 Ole o Devel vazdinđa hem ćhivđa le ki pi desno strana sar Vođa hem Spasitelj, te šaj o Izraelcija te pokajinen pe hem te oven oprostime olenge grehija. 32 Amen hijam svedokija ando odola događaja, hem o sveti duh, kova o Devel dela okolenđe kola šunena le sar pe vladare.“ 33 Ked odova šunđe, odobor holjanđe so manglje te mudaren len. 34 Ama, tegani anglo Sinedrion ikljilo jekh farisej kova vićinđa pe Gamalilo, o učitelj ando Zakon kas celo narodo poštujinđa. Ov rodinđa te legaren e apostolen hari avrijal. 35 Tegani phenđa: „Tumen kola hijen Izraelcija, pazinen so ka ćeren akale manušencar. 36 Sose angleder disavo vreme, pojavinđa pe o Tevda, kova pestar vaćerđa soj tano but važno manuš, hem oko 400 manuša hine ki olesi strana. Ama, ov hine mudardo hem sa olese sledbenikija našlje hem našaldilje. 37 Palo leste, ked hine o popis, pojavinđa pe o Juda Galilejac hem but manuša đelje palo leste. Hem ov mulo, a olese sledbenikija našlje. 38 Odolese akana phenava tumenđe: Ma zadinen akale manušen, nego mukhen len. Sose ako akava sikljovibe ja akija buti tani ando manuša, ka propadini, 39 ama ako tani ando Devel, na ka šaj te ćhinaven len. Inače, šaj te ovel so borinena tumen protiv o Devel.“ 40 On šunđe le, pa vićinđe e apostolen, šibinđe len, naredinđe lenđe više te na vaćeren ando e Isuseso anav hem mukhlje len te đan. 41 O apostolija palo odova đelje ando Sinedrion, radujinđe pe so hine dostojna te trpinen i lađ sebepi e Isuseso anav. 42 Hem svako dive ko hram hem kotar ćher ko ćher na ćhinavđe te sikaven hem te vaćeren i šukar vest ando Hrist Isus.