1. Korinćanima

2 E Devlese skupštinaće ko Korint, tumenđe kola hijen posvetime ko jekhipe e Hristeja Isuseja, vićime te oven sveta, sar hem sarinenđe ko razna thana kola verujinena ko Gospod o Isus Hrist, olengo hem amaro Gospod. 10 Podstakninava tumen, phraljalen ko anav amare Gospodeso Isusese Hristeso, sare jekh te vaćeren hem maškaro tumende ma te oven podele, nego te oven ko jekhipe hem te razmislinen ko isto način. 20 Kaj tane o mudra manuša ando akava sveto? Kaj tane o pismoznalcija? Kaj tane okola so mangena te raspravinen pe? Na mothođa li o Devel so i mudrost ando akava sveto tani glupost? 21 Odolese so e Devlesi mudrost dićhola ko akava: O sveto na penđarđa e Devle prekali pi mudrost, ama o Devel odlučinđa prekalo dilinipe ando odova so propovedini pe te spasini okolen kola verujinena. 23 a amen propovedinaja e Hriste kova hine kovimo ko stubo, kova tano e Judejconenđe uzrok aso spoticanje, a e manušenđe ando avera narodija dilinipe. 26 Dikhen, phraljalen, so maškaro tumende nane but vićime ando okola soj tane mudra premalo e manušenge merilija, ni but zorale, ni but ando okola kola avena ando ugledna porodice. 27 Ama, o Devel birinđa okole kastar o manuša mislinena soj tano dilino, te lađaćeri e mudro manušen hem o Devel birinđa okole kastar o manuša mislinena soj tano slabo, te lađaćeri e zoralen. 28 O Devel birinđa odova so o manuša smatrinena so nane vredno – so nane važno hem so mrzinena – te uništini odova so o manuša smatrinena soj tano vredno. 29 Odova ćerđa te na vazdel pe nijekh manuš anglo Devel. 30 Ama o Devel dinđa tumen prilika te oven ko jekhipe e Isuse Hristeja, kova mothovđa amenđe e Devlesi mudrost hem pravednost hem prekalo kaste hijam posvetime hem oslobodime prekali i otkupnina, 31 te bi ovela sar soj tano pisimo: „Ko hvalini pe, nek hvalini pe e Jehovaja.“