Nemija
8 Sa o manuša sar jekh ćedinđe pe ko trg anglo Panjale udara. Phenđe e pisarese e Jezdrase te anel i knjiga ando Mojsijeso zakon, kova o Jehova dinđa e Izraelese. 2 O sveštenik Jezdra prvo dive ando eftato masek anđa o Zakon anglo ćedime manuša, anglo murša, anglo đuvlja hem anglo sare kola šaj hine te haljon okova so šunđe. 8 On ko glaso čitinđe andi knjiga, ando Zakon kotar o ćaćutno Devel, tumačinđe le hem objasninđe so odova značini. Ađahar pomožinđe e narodose te haljol odova so hine čitimo. 9 Palo odova o Nemija, kova hine namesnik, o sveštenik Jezdra, kova hine pisar, hem o Levitija kola sikavđe e manušen, phenđe sa e manušenđe: „Akava dive tano sveto e Jehovase, tumare Devlese. Ma tugujinen hem ma roven.“ Sose sa o manuša runđe đi šunđe o lafija ando Zakon. 10 Ov pana phenđa lenđe: „Đan, han o najšukar habe hem pijen o gudle piba hem bićhalen hrana okolenđe kola nane len ništa te han, sose akava dive tano sveto amare Gospodese. Ma oven žalosna, sose e Jehovasi radost tani tumari snaga.“ 11 O Levitija trudinđe pe te smirinen sa e manušen, vaćerindoj: „Ma roven, sose akava dive tano sveto. Ma oven žalosna.“ 12 Sa o manuša đelje te han hem te pijen, te bićhalen maro jekh jekhese hem te veselinen pe, sose haljilje o lafija kola hine lenđe vaćerde.