Psalam

34 Uvek ka hvalinav e Jehova, na ka ćhinavav te hvalinav le. 2 Me ka hvalinav man e Jehovaja, o krotka ka šunen odova hem ka radujinen pe. 3 Hvalinen mancar e Jehova, zajedno te slavina oleso anav. 4 Molinđum man e Jehovase hem ov šunđa man. Svako dar koja hine man ov cidinđa mandar. 5 Bahtale tane okola so verujinena koro leste, on niked na ka oven lađaćerde. 6 Akava nevažno manuš vićinđa e Jehova hem ov šunđa le, spasinđa le ando sa olese nevolje. 7 E Jehovaso anđeo arakhi okolen kola darana kotar Devel hem izbavini len. 8 Probinen hem dikhen kobor tano o Jehova šukar. Bahtalo tano o manuš kase tano ov than kuri šaj te garavi pe. 9 Daran ando Jehova, sa olese sveta sluge, sose okolenđe so darana olestar ništa na falini. 10 Čak hem zorale terne lavija disavo puti nane len so te han, a okola so rodena e Jehova sa ka ovel len. 11 Aven, me ćhave, šunen man, ka sikavav tumen te daran ando Jehova. 12 Ko tumendar radujini pe e životose hem bi mangela but te živini hem te ovel bahtalo? 13 Tegani nek arakhi pi ćhib ando lošnipe hem po muj ando hovajbe. 14 Nek cidel pe ando lošnipe hem nek ćerel odova soj tano šukar, nek rodel o mir hem nek ćerel te ovel mir. 15 E Jehovase jaćha dikhena e pravednikonen, hem olese kana šunena olengo rojbe. 16 Ama o Jehova irini po šero ando okola kola ćerena lošnipe. Ov ka uništini len hem nikase više na ka aven ki godi. 17 O pravednikija rodinđe pomoć ando Jehova hem ov šunđa len, spasinđa len ando sa olenge pharipa. 18 O Jehova tano paše okolencar kola tane phage vileja, ov spasini okolen kola tane obeshrabrime. 19 But pharipa isi le o pravedno manuš, ama ando sa o Jehova ikali le. 20 Ov arakhi sa olese kokala, nijekh olendar na ka ovel phago.