Isaija
40 „Tešinen, tešinen me narodo“, phenela tumaro Devel. 3 Nekaso glaso šunđola ki pustinja: „Čistinen o drumo e Jehovase! Ćeren amare Devlese ravno drumo prekali pustinja. 4 Nek vazdel pe svako dolina, nek mukhel pe svako gora hem svako brego! O bregija nek oven ravna, o drumija kola nane ravna nek oven ravnica! 5 Tegani ka otkrijini pe e Jehovasi slava hem sa o manuša ka dikhen la, sose odola lafija tane ando Jehovaso muj.“ 8 I ćar šućola hem i luludi venoni, ama o lafi ando amaro Devel aćhola zauvek.“ 10 O Svevišnjo Devel Jehova ka avel hem ka mothovi pi moć, oleso vas ka vladini. Aće, koro leste tani i nagrada, anglo leste tani i plata koja ov dela. 11 Sar pastiri ov ka brinini pe ando po stado. Pe vasteja ka ćedel e tikne bakren, ki angalja ka akhari olen. Mangipaja ka legari okolen kola isi len tikne bakre. 22 Ov bešela upro phuvjako krugo, kase tane o manuša sar o skakavcija. Ov phravela o nebo sar vala, phravela le sar o šatori kuri živini pe. 26 „Vazden tumare jaćha upre hem dikhen! Ko ćerđa sa odova? Okova kova vodini e ćerenjen sar e vojska hem đenela len. Svakona ko anav đanela. Sebepi olesi bari moć hem sila nijekh na nedostajini. 27 Jakov sose pheneja, hem tu Izrael sose vaćereja: ’O Jehova na dikhela sar živinava, o Devel na marini asi nepravda koja doživinava‘? 28 Na đaneja li? Na šunđan li? O Jehova, kova ćerđa sa so isi ki phuv, tano večno Devel. Ov niked na ćhinđola hem niked na našali pi snaga. Niko našti te haljol o buća kola ov haljola. 29 Ov e umorno manušese irini i snaga, okolese kova nane zoralo dela bari snaga. 30 O tikne ćhave ka ćhinđon hem na ka ovel len snaga, o terne ćhave na ka ovel len snaga hem ka peren, 31 ama okola kola uzdajinena pe upro Jehova ka dobinen nevi snaga. Ka vazden pe ko phakha sar o orlija. Ka prastan hem na ka umorinen pe, ka phiren hem na ka ćhinđoven.“