Isaija

14 O Jehova ka smilujini pe e Jakovese hem palem ka birini o Izrael. Ka del len te živinen ki pi phuv, a o strancija ka aven te živinen maškaro Jakovese ćhave. 2 O narodija ka legaren len hem ka anen len ko olengo than, a o izraelsko narodo ka lel len te oven olenge sluge hem sluškinje ki Jehovasi phuv. Ađahar ka zarobinen okolen kola olen zarobinđe hem ka oven gospodarija upro okola kola zorjeja ćhivđe len te ćeren buti. 12 Ando nebo peljan tu so svetlineja, ćhavo ando sabaj! Ki phuv hijan fordimo, tu so gazinđan e narodon! 13 Phenđan ko to vilo: ’Đi o nebo ka ukljav. Upreder e Devlese ćerenja ka vazdav mo presto hem ka bešav ki gora koja tani ko sever, kuri služini pe e Devlese. 14 Ka ukljav upreder o oblakija. Ka ovav sar o Najbaro.‘ 15 Ama ka ove fordimo ko grobo, hor ki grobno jama. 22 „Ka uštav upro lende“, phenela o Jehova, o Komandanti upro sa o vojske. „Ka uništinav e Vaviloneso anav hem na ka aćhavav nijekhe manuše, ni e ćhaven ni e naslednikonen“, phenela o Jehova. 23 „Ka dav le aso bodljikava bale hem ka ćerav olestar močvara hem potpuno ka uništinav le“, phenela o Jehova, o Komandanti upro sa o vojske. 24 O Jehova, o Komandanti upro sa o vojske, dinđa sovel: „Sar zamislinđum, ađahar hem ka ovel, so odlučinđum, odova hem ka ovel. 25 Ka phagav e Asirco ki mi phuv hem ka gazinav le ko me gore. Ka huljavav oleso jaram ando mo narodo hem oleso pharipe ando olengo dumo.“ 28 Okova berš ked mulo o kralj Ahaz, akava hine vaćerdo: 29 „Filistejo, nijekh manuš kova živini odothe ma te radujini pe soj tano phago o kaš ando okova kova khuvđa tut. Sose andi sapesi loza ka ikljol i otrovnica, e sapeso potomstvo ka ovel sigutni otrovnica.