Poslovice
7 Mo ćhavo, ićer tut ko me lafija hem arakh me zapovestija sar o barvalipe. 2 Pazin ko me zapovestija hem ka živine. Arakh me lafija sar zenica andi ti jakh. 3 Phan len ko te naja, pisin len ko to vilo, sar ked bi pisineja diso ko bar. 4 I mudrost nek ovel tuće sar phen, a i razboritost sar paše familija, 5 te šaj te arakhen tut andi grešnica, andi bludnica koja vaćeri gudle lafija. 6 Đi hijum le ćhere, dikhljum kotar đami. 7 Dikhljum okolen so nane len iskustvo, hem maškaro terne primetinđum jekhe terne ćhave kova hine nerazumno. 8 Nakhlja kotar olaki ulica hem pođinđa pravo premalo olako ćher, 9 samo so raćilo, ko akšami, ked perela i rat hem ked perela i tomnina. 10 Tegani anglo oleste ikljilji jekh romni uravdi sar bludnica hem ko vilo hine laće te prevarini le. 11 Niko našti te aćhavi la hem zorale šeresi tani, niked na bešela ćhere. 12 Hari tani ki ulica, hari tani ko trgija, ko svako ćoško andi ulica ađićeri. 13 Dolinđa le hem ćumudinđa le hem bizi lađ phenđa lese: 14 „Hijum le te dav o žrtve ando zajedništvo. Avdije ispuninđum me zavetija kola dinđum. 15 Odolese ikljiljum anglo tute, te rodav tut, hem arakhljum tut. 16 Ko mo kreveti ćhivđum o najšuže pokrivačija hem o egipatsko šarimo lan. 17 Mo kreveti mirišini ki smirna, ki aloja hem ko cimet. 18 Ava te ova zajedno sa đi o sabaj, te uživina ko mangipe. 19 Mo rom nane ćhere, đelo ko but baro drumo. 20 Lelja peja but pare, ka irini pe ćhere ko dive ando pherdo mesec.“ 21 Pekle lafencar lelja olesi godi, pe gudle lafencar prevarinđa le. 22 Ov odmah pođinđa palo late, sar o guruv ked đala te ćhinen le, sar o dilino manuš kova ka ovel phanlo ko lancija, 23 đi i strela na khuvela ki olesi jetra. Sar i ćirikli koja khuvela ki zamka, ov na đanela so ka našali po životi. 24 Odolese, šun man, mo ćhavo, šun šukar so ka phenav tuće. 25 Ma mukh odija romni te utičini upro tute. Ma đa palo late. 26 Sose but đene mulje sebepi olako hem bute manušen oj mudarđa. 27 Olako ćher tano o drumo kova legari ko grobo, kotar olako ćher đala pe ko meribe.