2. Letopisa

34 O Josija hine le ofto berš ked ulo kralj. Vladinđa 31 berš ko Jerusalim. 2 Ov ćerđa odova soj tano ispravno anglo Jehovase jaćha hem ćerđa odova so ćerđa oleso rođako o David, na đelo ni desno ni levo. 3 Ko oftoto berš andi pi vladavina, đi pana hine ćhavo, počminđa te služini e Devlese ando po paradad o David, a ko dešudujto berš počminđa te čistini i Juda hem o Jerusalim ando sveta thana, sveta kašta, idolija hem metalna kipija. 9 Alje ko prvosveštenik Helkija hem dinđe le pare kola anđe ko Devleso ćher. O Levitija kola ćerđe buti ko udara ćedinđe odola pare ando Manasijeso hem ando Jefremeso pleme hem ando celo Izrael, sar hem ando Judaso hem ando Venijamineso pleme hem ando manuša kotar Jerusalim. 10 Palo odova o pare dinđe e manušenđe kola hine ćhivde te dikhen odova so ćerela pe ko Jehovaso ćher, a okola so ćerđe buti ko Jehovaso ćher koristinđe odola pare te obnovinen hem te popravinen e Jehovaso ćher. 11 Dinđe odola pare e majstorenđe hem okolenđe so gradinena te ćinen o bara kola tane klesime hem i građa ando kaš aso potporna grede hem avera grede, te obnovinen o građevine kola e Judake kraljija mukhlje te propadinen. 14 Đi ikalđe o pare kola anđe pe ko Jehovaso ćher, o sveštenik Helkija arakhlja i knjiga ando Jehovaso zakon kova hine dindo prekalo Mojsije. 18 Tegani o pisar Safan phenđa e kraljese: „O sveštenik Helkija dinđa man akija knjiga.“ Hem o Safan počminđa te čitini la anglo kralj. 19 Ked o kralj šunđa o lafija ando Zakon, pharavđa pe šeja. 20 Palo odova zapovedinđa e Helkijase, e Safanese ćhavese e Ahikamese, e Mihase ćhavese e Avidonese, e pisarese e Safanese hem e kraljese slugase e Asajese: 21 „Đan hem pućen e Jehova maje hem okolenđe kola aćhilje ko Izrael hem ki Juda. Pućen aso odova so pisini ki akija knjiga koja arakhlje. O Jehova ka mothovi amenđe pi bari holi sose amare paradada na ićerđe pe ko Jehovaso lafi niti ćerđe sa akava so pisini ki akija knjiga.“ 33 Palo odova o Josija cidinđa sa e gadno devlen ando sa o thana ko Izrael hem vićinđa sarinen kola hine ko Izrael te počminen te služinen e Jehovase, pe Devlese. Sa đi ov hine đivdo, na aćhavđe e Jehova, e Devle ando pe paradada.