Jestira

4 O Mardohej ulo moćno ko kraljeso dvoro hem olestar šundilo ko sa o pokrajine, sose hine le sa pobari moć. 15 Ađahar ko dešuštarto dive ando masek adar, o Judejcija kola hine ko Susan ćedinđe pe hem mudarđe pana 300 manušen, ama ništa na lelje ando olenge buća. 16 Hem avera Judejcija ko avera e kraljese pokrajine ćedinđe pe hem braninđe pe. Mudarđe 75 000 manušen kola mrzinđe len hem ađahar oslobodinđe pe ando pe dušmanija. Ama ništa na lelje ando olenge buća. 20 O Mardohej pisinđa odola događaija hem bićhalđa lila sa e Judejcenđe ko sa o pokrajine ando kralj Asvir, sar okolenđe so hine paše ađahar hem okolenđe kola hine dur. 21 Ov zapovedinđa lenđe svako berš te slavinen o dešuštarto hem o dešupanđto dive ando masek adar 22 sose ko odola dive o Judejcija oslobodinđe pe ando pe dušmanija hem sose odova masek olengi žalost ulji radost hem andi olengi tuga ulo slavlje. Odola dive hine odredime te oven dive andi gozba hem ando veselje ko kola bi o Judejcija bićhalena hrana jekh jekhese hem bi dena poklonija e ćororenđe. 26 Odolese odola dive vićinena pe Purim, ando lafi pur. Sebepi sa okova so pisinđa ko odova lil hem sebepi odova so dikhlje hem so doživinđe, 27 o Judejcija dinđe lafi so on, olenge ćhave hem sa okola kola ka mangen te učestvujinen, obavezno ka slavinen odola duj dive svako berš ko vreme kova tano odredimo odolese hem ka ćeren sa soj tano olenđe pisimo. 28 Odola dive na isminena te bistren hem valjani te slavinen len andi generacija ki generacija, ki svako porodica, ki svako pokrajina hem ki svako diz. O Judejcija na isminena te ćhinaven te slavinen o dive ando Purim hem i uspomena upro olende na ismini te našali pe maškaro olenge potomkija.