Psalam

17 Jehova, šun ked molinava tut asi pravda, šun ked molinava tut asi pomoć, šun mi iskreno molitva. 2 Sudin pravedno ki mi korist, nek dikhen te jaćha soj tano ispravno. 3 Tu dikhljan so isi man ko vilo, ispitinđan man raćate, pročistinđan man. Dikhljan so na planirinava nisavo lošnipe hem so na grešinava me mujeja. 4 So god te ćeren avera manuša, me šunava te lafija hem ićerava man po dur ando razbojnička drumija. 5 Pomožin maje uvek te phirav ko te drumija, hem nane te perav. 6 Vićinava tut, Devla, sose đanava so ka šune man. Teljov hem šun man, šun me lafija. 7 Mothov to verno mangipe ađahar so ka ćere šukar buća. Tu spasineja okolen kase tani ti desnica utočište ando manuša kola buninena pe protiv tute. 8 Arakh man sar i zenica andi ti jakh, garav man tali senka ando te pakha.