Isaija

4 Hem ked ka phurjoven me ka ovav isto. Hem ked tumare bala ka parnjon me ka pomožinav tumen. Me ka akharav tumen, ka podupirinav tumen hem ka izbavinav tumen sar so ćerđum đi akana. 6 O manuša tresinena o zlato andi pi vreća hem ki vaga merinena o srebro. Lena e zlatare te ćerel lenđe devle. Palo odova perena ki phuv hem klaninena pe lese. 7 Akharena le ko pe pike hem ćhivena le ko oleso than. Ov bešela uduri hem na mrdini kotar po than. Vićinena le, ama na odgovorini lenđe, ov nikas našti te spasini. 9 Setinen tumen ko buća kola angleder ulje, so me hijum o Devel hem so nane nijekh aver. Me hijum o Devel hem niko nane sar mande. 10 Me ando početko vaćerava so ka ovel ko krajo, but angleder vaćerava odova so pana na ulo. Me phenava: ’So odlučinđum odova ka ovel hem ka ćerav sa so mangava.‘ 11 Kotar istok vićinava e ćiriklja soj tani grabljivo, andi dur phuv vićinava e manuše kova ka ćerel odova so odlučinđum. Odova so vaćerđum, odova ka ispuninav. Ka ćerav odova so isi man ki godi.