Postanak

2 Tegani o Devel phenđa lese: „Molinava tut, le tuvaja te ćhave, te jedinco, e Isake, kas odobor mangeja, đa ki phuv Morija hem odothe de le sar žrtva paljenica ko brego kova ka mothovav tuće.“ 5 Tegani phenđa pe slugenđe: „Tumen aćhoven akate e hereja, a mo ćhavo hem me ka đa uduri te poklonina amen e Devlese hem ka irina amen koro tumende.“ 7 Tegani o Isak phenđa pe dadese e Avrahamese: „Mo dad!“ Ov phenđa lese: „Vaćer, mo ćhavo.“ A ov pućlja le: „Akate tane i jag hem o kašta, ama kaj tano o bakro asi žrtva paljenica?“ 8 O Avraham phenđa: „O Devel ka arakhi e bakre asi žrtva paljenica, mo ćhavo.“ Hem o solduj nastavinđe te phiren. 11 Ama e Jehovaso anđeo vićinđa le kotar nebo hem phenđa lese: „Avraham! Avraham!“, a ov odgovorinđa: „Akate hijum!“ 12 Palo odova phenđa lese: „Ma vazde to vas upro ćhavo hem ma ćer lese ništa, sose akana đanava so daraja kotar Devel sose na odbinđan te de maje te ćhave, te jedinco.“ 15 E Jehovaso anđeo pana jekh puti ando nebo vićinđa e Avrahame 16 hem phenđa: „’Dava sovel upro mande‘, phenela o Jehova, ’odolese so akava ćerđan hem na odbinđan te de man te ćhave e jedinco, 17 ćaće ka blagoslovinav tut hem ka ćerav to potomstvo te ovel sar o ćerenja ko nebo hem i pošik ki morsko obala. To potomstvo ka osvojini pe dušmanenge dizja. 18 Prekalo to potomstvo ka blagoslovinen pe sa o narodija ki phuv sebepi so hijan le maje poslušno.‘ “