Marko

6 Ama o Isus phenđa: „Mukhen la. Sose zadinena la? Oj ćerđa maje šukaripe. 8 Ćerđa odova so šajinđa: oj anglal ćhorđa o mirisno ulje ko mo telo te bi pripremini le aso parujbe. 9 Verujinen maje, kuri god te propovedini pe i šukar vest ko celo sveto, ka pomini pe hem odova so ćerđa akija romni, sar spomen upro late. 12 Ko prvo dive ko Prazniko ando mare bizo kvasco, ked premalo običaj dinđa pe i pashalno žrtva, olese učenikija pućlje le: „Kaj mangeja te spremina tuće i pashalno večera?“ 13 Tegani bićhalđa duje učenikonen hem phenđa lenđe: „Đan ki diz hem uduri ka resen jekhe manuše kova akhari jekh khoro panjeja. Pođinen oleja 14 hem kuri ov khuvela phenen e domaćinese: ’O učitelj pućela: „Kaj tani i soba e gostonenđe ki koja šaj te hav i pashalno večera me učenikonencar?“ ‘ 15 Ov ka mothovi tumenđe bari soba ko sprat, sredimi hem namestimi. Uduri spreminen amenđe i pashalno večera.“ 16 O učenikija đelje ki diz hem arakhlje sa ađahar sar so phenđa lenđe hem spreminđe sa asi Pasha. 17 Ked pelji i rat, alo odothe e dešuduje apostolencar. 18 Đi bešlje ko astali hem đi halje, o Isus phenđa lenđe: „Verujinen maje, jekh tumendar, kova hala mancar, ka izdajini man.“ 19 Ked šunđe odova, ulje but tužna hem jekh palo jekheste pućlje le: „Te na hijum me?“ 20 A ov phenđa lenđe: „Jekh tumendar kova macini mancar o maro ko ćaro. 21 Ćaće, o manušikano Ćhavo đala, sar soj tano pisimo olestar, ama teško okole manušese kova izdajini e manušikane Ćhave! Odole manušese pošukar bi ovela hine hić te na bijanđol.“ 22 Đi halje, lelja o maro hem palo odova so molinđa pe, phaglja le, dinđa len hem phenđa: „Len, akava predstavini mo telo.“ 23 Lelja i čaša, zahvalinđa pe e Devlese hem dinđa len. Hem sare pilje olatar. 24 Phenđa lenđe: „Akava predstavini mo ’rat ando savez‘, kova ka ćhorel pe butenđe. 25 Verujinen maje, više na ka pijav vino sa đi o dive ked ka pijav o nevo vino ko Devleso Kraljevstvo.“ 26 Palo odova so đilabđe o đilja kolencar hvalinđe e Devle, đelje ki Maslinsko gora. 27 Tegani o Isus phenđa lenđe: „Sare tumen ka aćhaven man, sose tano pisimo: ’Ka khuvav e pastire hem o bakre ka našen.‘ 28 Ama ked ka uskrsninav, ka đav ki Galileja hem uduri ka ađićerav tumen.“ 29 A o Petar phenđa lese: „Ako hem sa avera aćhavena tut, me na ka aćhavav tut.“ 30 Tegani o Isus phenđa lese: „Verujin maje, pana akija rat, angleder so o bašno duj putija ka đilabi, trin putija ka phene so na penđareja man.“ 31 Ama ov nekobor putija phenđa: „Čak hem ako mora te merav tuvaja, niked na ka phenav so na penđarava tut.“ Ađahar phenđe hem sa avera učenikija. 32 Alje ko than kova vićini pe Getsimanija. Ov phenđa pe učenikonenđe: „Bešen akate đi me molinava man.“ 33 Lelja peja e Petare, e Jakove hem e Jovane. Tegani osetinđa baro pharipe hem bari tuga. 34 Phenđa lenđe: „But maje pharo. Aćhoven akate hem oven đangavde.“ 35 Đelo hari podur, pelo ko koćija hem počminđa te molini pe, ako tano moguće, te na resel le odija phari situacija. 36 Hem pana phenđa: „Mo Dad, tu šaj sa te ćere. Cide akija čaša mandar. Ama, ma te ovel sar me so mangava, već sar tu so mangeja.“ 37 Palo odova, irinđa pe ko učenikija hem arakhlja len sar sovena hem phenđa e Petarese: „Simone, sose soveja? Naštine li te aćhove đangavdo barem jekh sati? 38 Oven đangavde hem molinen tumen te na peren ko iskušenje. Ćaće, o manuš mangela te ćerel okova soj tano šukar, ama oleso telo tano slabo.“ 39 Palo odova, palem đelo hem molinđa pe isto lafencar. 40 Palem irinđa pe hem arakhlja len sar sovena, sose dolinđa len o sojbe. Hem na đanđe so te odgovorinen lese. 41 Ked irinđa pe o trito puti, phenđa lenđe: „Akana arakhljen te soven hem te odmorinen tumen! Ma soven više! Alo o vreme! Aće, o manušikano Ćhavo tano dindo ko grešnikonenge vasta. 42 Ušten te pođina. Avela okova so ka izdajini man.“ 43 Đi pana vaćerđa, alo o Juda, kova hine jekh ando dešuduj, hem oleja alje but manuša kola hine len mačija hem kašta. Olen bićhalđe o sveštenička poglavarija, okola so penđarđe o Zakon hem o starešine. 44 Oleso izdajniko phenđa lenđe savo znak ka del len: „Kas ka ćumudinav, odova tano. Astaren le hem nek legari le i straža.“ 45 Samo so reslja, alo uzo Isus hem phenđa: „Učitelju!“ Palo odova ćumudinđa le. 46 Tegani astarđe e Isuse. 47 Ama jekh ando okola so hine uduri ikalđa o mač, napadinđa e prvosveštenikose robe hem ćhinđa leso kan. 48 A o Isus phenđa lenđe: „Aljen e mačencar hem e kaštencar te astaren man, samći ked hijum razbojniko? 49 Svako dive hijum le tumencar ko hram hem sikavđum e manušen, a tumen na astarđen man. Ama, odova tano te bi ispunini pe odova so pisini ko Lil.“ 50 Tegani sa o učenikija aćhavđe le hem našlje. 51 A palo leste đelo jekh ćhavo kova upro peste hine le samo laneno ogrtači. On manglje te astaren le, 52 ama ov aćhavđa po ogrtači hem našlja. 53 Palo odova legarđe e Isuse ko prvosveštenik. Uduri ćedinđe pe sa o sveštenička poglavarija, o starešine hem okola so penđarđe o Zakon. 54 O Petar dural đelo palo leste sa đi o dvoro ando prvosveštenikoso ćher. Bešlja e slugencar hem taćilo uzi jag. 55 Aso odova vreme o sveštenička poglavarija hem celo Sinedrion rodinđe disavo razlog te optužinen e Isuse, te bi mudarena le, ama ništa na arakhlje. 56 But đene vaćerđe hovajba olestar, ama olenge lafija na slažinđe pe. 57 Alje pana disave manuša hem vaćerđe hovajba olestar: 58 „Šunđam le sar vaćeri: ’Ka peravav akava hram kova tano ćerdo manušikane vastencar hem aso trin dive ka vazdav aver kova na ka ovel ćerdo manušikane vastencar.‘ “ 59 Ama hem ko odova olenge lafija na slažinđe pe. 60 Ko krajo o prvosveštenik uštilo, terdilo maškaral hem pućlja e Isuse: „Sose ništa na vaćereja? So pheneja ando akala lafija so vaćerena protiv tute?“ 61 Ama ov ćutinđa hem ništa na vaćerđa. O prvosveštenik palem pućlja le: „Da li tu hijan o Hrist, o Ćhavo ando Najbaro?“ 62 Tegani o Isus phenđa lese: „Ja, me hijum. Hem ka dikhen e manušikane Ćhave sar bešela ki desno strana ando Najbaro hem avela ko nebeska oblakija.“ 63 Tegani o prvosveštenik pharavđa pe šeja hem phenđa: „So valjanena amenđe o svedokija? 64 Šunđen so vaćeri protiv o Devel. So mislinena?“ Sare phenđe so zaslužini te merel. 65 Disave počminđe te ćhungaren le, te ućharen leso muj hem te khuven le, vaćerindoj: „Ako hijan proroko, vaćer ko khuvđa tut!“ A hem o stražarija khuvđe le šamarke hem legarđe le. 66 Đi o Petar hine tele ko dvoro, alji jekh ando prvosveštenikose sluškinje 67 hem ked dikhlja sar o Petar taćola uzi jag, dikhlja ano leste hem phenđa: „Hem tu hijan le e Isuseja, okoleja ando Nazaret.“ 68 A ov na manglja te priznajini hem phenđa: „Na penđarava le hem na haljovava so vaćereja.“ Hem ikljilo premalo dvoro. 69 A okija sluškinja dikhlja le hem uduri hem palem phenđa okolenđe kola hine odothe: „Ov tano jekh olendar.“ 70 Ama ov odova palem na manglja te priznajini. Hari palo odova, okola so hine uduri pana jekh puti phenđe e Petarese: „Tu sigurno hijan jekh olendar, sose hijan Galilejco.“ 71 A ov počminđa te del sovel hem te vaćeri: „Na penđarava odole manuše kastar vaćerena!“ 72 Tegani o bašno đilabđa hem o dujto puti hem o Petar setinđa pe so o Isus phenđa lese: „Angleder so o bašno ka đilabi duj putija, trin putija ka phene so na penđareja man.“ Palo odova osetinđa bari dukh ko vilo hem počminđa but te rovel.