Luka

15 Đi vaćerđe, o Isus đelo nakro lende hem pođinđa olencar, 16 ama on naštine te penđaren le. 18 Jekh olendar, kova vićinđa pe Kleopa, odgovorinđa lese: „Tu li hijan jedino stranco ko Jerusalim kova na đanela so koro leste akala dive desinđa pe?“ 19 Ov pućlja len: „So hine?“ Odgovorinđe lese: „Odova so hine e Isuseja ando Nazaret, kova lafencar hem delijencar potvrdinđa soj tano baro prorok anglo Devel hem anglo celo narodo. 20 Amare sveštenička poglavarija hem starešine predajinđe le te ovel osudimo ko meribe hem kovinđe le ko stubo. 21 A amen nadinđam amen soj tano ov okova kova ka izbavini o Izrael. Uzo odova, akava tano trito dive sar ulo sa odova. 22 Pana buninđe amen disave romnja kola zajedno amencar sledinđe le. On rano sabale đelje ko oleso grobo, 23 ama na arakhlje o telo, pa alje hem vaćerđe amenđe so dikhlje e anđelen kola vaćerđe lenđe soj tano ov đivdo. 24 Tegani disave ando amare đelje đi o grobo hem arakhlje sa sar so phenđe o romnja, ama ole na dikhlje.“ 25 A ov phenđa lenđe: „O kobor samo hijen nerazumna! Kobor tano tumenđe pharo te verujinen ko sa odova so phenđe o prorokija! 26 Na valjanđa li o Hrist sa odova te trpini hem te primini pi slava?“ 27 Hem počmindoj kotar Mojsije hem sa o Prorokija, ov objasninđa lenđe sa okova soj tano olestar pisimo ko celo Lil. 30 Đi bešlja olencar ko astali, lelja o maro hem molinđa pe. Palo odova phaglja o maro hem dinđa len. 31 Tegani phravdilje olenge jaćha hem penđarđe le, ama ov našaldilo anglo lende. 32 Hem phenđe jekh jekhese: „Na pherdilo li amaro vilo đi vaćerđa amencar ko drumo, đi objasninđa amenđe o Lil?“ 34 kola vaćerđe: „O Gospod ćaće uskrsninđa hem pojavinđa pe e Simonese!“ 36 Đi vaćerđe odolestar, o Isus pojavinđa pe maškaro lende hem phenđa lenđe: „Nek ovel tumen mir.“ 37 A on hine šokirime hem darandilje, hem mislinđe so dikhena disave duho. 44 Tegani phenđa lenđe: „Đi hijum le tumencar, phenđum tumenđe so mora te ispunini pe sa soj tano mandar pisimo ko e Mojsijeso zakon, ko Prorokija hem ko Psalmija.“ 45 Tegani pomožinđa lenđe jasno te haljon o Lil. 52 A on pokloninđe pe olese hem but radosna irinđe pe ko Jerusalim. 53 Hem stalno hine ko hram te slavinen e Devle.