Jovan

5 O Isus vazdinđa po šero hem dikhlja kobor manuša avena, odolese pućlja e Filipe: „Kaj te ćina maro aso akala manuša?“ 9 „Akate tano jekh tikno ćhavo kova isi le panđ mare kotar ječam hem duj tikne maćhe. Ama soj tano odova aso odobor manuša?“ 11 Palo odova o Isus lelja o mare hem zahvalinđa pe e Devlese, pa podelinđa len okolenđe kola othe bešlje. Ađahar podelinđa hem o maćhe, pa hine len te han kobor manglje. 12 Ked ćalilje, phenđa pe učenikonenđe: „Ćeden sa so aćhilo, ništa te na fordel pe.“ 13 O učenikija ćedinđe odova so aćhilo ando panđ ječmena mare palo odova so o narodo halja hem pherđe 12 korpe. 15 A o Isus đanđa so isi len namera te aven hem ki sila te ćhiven le ovel kralj, odolese palem đelo ki gora, kokri. 16 Ked raćilo, olese učenikija huljilje ki obala. 17 Khuvđe ko čamco hem prekalo more pođinđe ko Kapernaum. Već raćilo, a o Isus pana na alo koro lende. 18 Phudinđa bari bavlal hem ko more počminđe te oven bare talasija. 19 Palo odova so e čamcoja đelje panđ ja šov kilometrija, o učenikija dikhlje e Isuse sar phirela ko more hem sar avela sa popaše ko čamco hem darandilje. 20 Ama, ov phenđa lenđe: „Me hijum, ma daran!“ 26 O Isus phenđa lenđe: „Ćaće phenava tumenđe, tumen na rodinđen man sose dikhljen o čudija, nego sose haljen odova maro hem ćaljiljen. 27 Ma ćeren buti aso habe kova ruminđola, nego aso habe kova na ruminđola hem anela večno životi. Asavko habe ka del tumen o manušikano Ćhavo, sose olese o Dad, o Devel dinđa le vlast te ćerel odova. 29 O Isus phenđa lenđe: „Akava tano odova so o Devel rodela – te verujinen ko okova kas ov bićhalđa.“ 30 A on pućlje le: „Savo znak ka mothove amenđe, te šaj te verujina koro tute ked ka dikha le? So ka ćere? 31 Amare phure halje mana ki pustinja, sar so hine pisimo: ’Dinđa len maro kotar nebo.‘ “ 32 O Isus phenđa lenđe: „Ćaće phenava tumenđe, o Mojsije na dinđa tumen o pravo maro, nego avdije mo Dad dela tumen pravo maro kotar nebo. 33 Sose e Devleso maro tano okova kova huljela kotar nebo hem dela e svetose životi. 35 O Isus phenđa lenđe: „Me hijum o maro ando životi. Ko god avela koro mande, na ka bokhaljol hem ko god verujini koro mande, nikad na ka trošaljol. 37 Sa okola kola mo Dad dela maje ka aven koro mande hem niked na ka fordav okole kova avela koro mande, 38 sose me na huljiljum kotar nebo te ćerav odova soj tano pali mi volja, nego te ćerav odova soj tano pali volja okolesi kova bićhalđa man. 39 A olesi volja tani te na našalav nijekhe ando okola kolen dinđa man, nego te uskrsninav len ko poslednjo dive. 40 Sose me Dadesi volja tani svako ko prihvatini e Ćhave hem verujini koro leste te dobini večno životi, a me ka uskrsninav le ko poslednjo dive.“ 44 Niko našti te avel koro mande ako na privucini le o Dad, kova bićhalđa man, a me ka uskrsninav le ko poslednjo dive. 45 Ko Prorokija hine pisimo: ’O Jehova ka sikavi sarinen.‘ Svako ko šunela e Dade hem sikljola olestar, avela koro mande. 51 Me hijum o đivdo maro, kova huljilo kotar nebo. Ako neko hala ando odova maro, ka živini večno. Odova maro tano mo telo, kova ka dav te šaj o sveto te živini.“ 53 Odolese o Isus phenđa lenđe: „Ćaće phenava tumenđe, ako na hana o telo ando manušikano Ćhavo hem na pijena oleso rat, nane tumen životi ano tumende. 57 Sar so me hijum đivdo sebepi o Dad, kova tano đivdo hem kova bićhalđa man, ađahar hem okova kova parvari pe me teloja ka ovel đivdo sebepi moklo. 62 So ka ovel ked ka dikhen e manušikane Ćhave sar đala upre, uduri kaj hine angleder? 64 Ama disave maškaro tumende nane len vera.“ O Isus odova phenđa sose kotar početka đanđa kola tane odola so nane len vera hem koj tano okova so ka izdajini le. 67 Tegani o Isus pućlja e dešudujen: „Te na mangen hem tumen te đan?“ 68 O Simon Petar odgovorinđa lese: „Gospode, koro kaste bi đaja? Tu isi tut o lafija ando večno đivdipe. 69 Amen verujinđam hem haljiljam so tu hijan e Devleso sveto Ćhavo.