2. Kraljevima

20 Ko odova vreme o Jezekija naborsalo hem hine ko meribe. Tegani o prorok Isaija, e Amoseso ćhavo, alo koro leste hem phenđa lese: „Ađahar phenela o Jehova: ’De o potrebna zapovestija te ćherutnenđe, sose ka mere. Na ka saćove.‘ “ 2 Ko odova ov irinđa po muj premalo zido hem počminđa te molini pe e Jehovase: 3 „Molinava tut, Jehova, setin tut so služinđum tuće verno hem celone vileja hem so ćerđum okova soj tano šukar anglo te jaćha.“ Tegani o Jezekija but runđa. 4 O Isaija pana na reslja ni đi ko srednjo dvoro ked alo lese e Jehovaso lafi: 5 „Irin tut hem vaćer e Jezekijase, kova tano vođa ando mo narodo: ’Ađahar phenela o Jehova, o Devel ando to rođako, o David: „Šunđum ti molitva hem dikhljum te asva. Aće, ka saćarav tut hem aso duj dive ka đa ko Jehovaso ćher. 6 Ka mukhav tut te živine pana 15 berš hem ka izbavinav tut hem akija diz ando vasta kotar asirsko kralj hem ka braninav akija diz sebepi moklo hem sebepi mo sluga, o David.“ ‘ “