Psalam
32 Bahtalo tano o manuš kaso prestup tano oprostimo, kaso greh tano koslo. 2 Bahtalo tano o manuš kas o Jehova na optužini aso greh hem ko kaso vilo nane hovajbe. 3 Đi garavđum me grehija, me kokala šućilje sose po celo dive runđum. 4 Dive-rat hine maje but pharo sose đanđum so tu na hijan zadovoljno mancar. Našalđum mi snaga sar so o pani šućola ko baro tatipe. 5 Ko krajo priznajinđum tuće mo greh, više na garavđum mi krivica. Phenđum: „Ka priznajinav e Jehovase me prestupija.“ Tu oprostinđan mi krivica, me grehija. 6 Aso odova ka molini pe tuće svako koj tano tuće verno đi pana šaj te arakhi tut. Tegani čak ni o problemija kola tane bare sar o panja kola uštilje na ka peraven tut. 7 Tu hijan mo zaklon, tu ka arakhe man ked hijum ko pharipa. Uzo mande ka oven o manuša kola ka radujinen pe sebepi moklo spasenje. 8 „Ka pomožinav tut te haljove o buća hem ka sikavav tut kole drumoja valjani te đa. Ka dav tut savet, mi jakh ka ovel upro tute. 10 O lošno manuš isi le but pharipa, a e manuše kova oslonini pe upro Jehova arakhi oleso verno mangipe. 11 Radujinen tumen sebepi o Jehova hem veselinen tumen, pravednikija! Oven radosna, sare kola isi tumen čisto vilo!