2. Kraljevima

5 O asirsko kralj napadinđa celo phuv. Alo đi ki Samarija hem trin berš hine okolo i diz. 6 Enjato berš đi vladinđa o Osija, o asirsko kralj osvojinđa i Samarija. Legarđa e Izraelcen ko ropstvo ki Asirija hem ćhivđa len te živinen ki Alaja hem ko Avor ki reka Gozan hem ko međanska dizja. 9 O Izraelcija ćerđe okova so nane ispravno anglo Jehova, olengo Devel. Ćerđe o obredna uzvišice ko sa pe thana, ando stražarska kule đi o utvrdime dizja. 10 Ćerđe o obredna stubija hem o obredna deblija ko svako ućo brego hem talo svako šužo hem baro kaš. 11 Hem ko sa o obredna uzvišice tharđe o prinosija, baš sar o narodija kolen o Jehova cidinđa anglo lende. Ćerđe lošna buća te bi vređinena e Jehova. 12 On služinđe e gadno idolenđe iako o Jehova phenđa lenđe te na ćeren odova. 13 O Jehova upozorinđa o Izrael hem i Juda prekalo sa pe prorokija hem prekalo sa pe videocija: „Ćhinaven te ćeren lošnipe! Ićeren tumen ko me zapovestija hem ko me odredbe, ko sa soj tano pisimo ko zakon kova dinđum tumare paradadenđe hem kova prenosinđum tumenđe prekalo me sluge, o prorokija.“ 14 Ama on na šunđe, već hine zorale šerese sar hem olenge paradada kola na verujinđe e Jehovase, pe Devlese. 29 Ama svako narodo ćerđa pese pe devle hem ćhivđa le ko svetilišta ko uzvišice kola ćerđe o Samarićanija. Svako narodo odova ćerđa ko dizja ko kola živinđa.