Luka

5 Jekhvar o Isus terdilo uzo Genezaretsko jezero, a o manuša gurinđe pe okolo leste te šunen e Devleso lafi. 2 Ov dikhlja duj čamcija ki obala ando jezero hem e ribaren kola uzo lende thovđe pe mreže. 3 Ov khuvđa ko Simoneso čamco hem pućlja le te ciden pe hari andi obala. Tegani bešlja hem počminđa te sikavi e manušen ando čamco. 4 Ked ćhinavđa te sikavi len, phenđa e Simonese: „Đa uduri kuri tano hor hem forden o mreže ko pani.“ 5 A o Simon phenđa: „Učitelju, celo rat mučinđam amen hem ništa na astarđam, ama ked tu ađahar pheneja, ka fordav o mreže.“ 6 Ked ćerđe odova, astarđe odobor but maćhen so o mreže počminđe te pharavđon. 7 Odolese ćerđe vasteja pe amalenđe kotar aver čamco te aven hem te pomožinen len. On alje hem pherđe o solduj čamcija, odobor so harićkase hine ka batinen. 8 Ked o Simon Petar dikhlja odova, pelo anglo Isusese pre hem phenđa: „Gospode, đa mandar sose hijum grešno manuš.“ 9 Sose ked dikhlje kobor maćhe astarđe, čudinđe pe hem ov hem sa okola kola hine oleja, 10 a isto ađahar hem e Zevedejese ćhave, o Jakov hem o Jovan, kola ćerđe buti e Simoneja. Ama, o Isus phenđa e Simonese: „Ma dara! Kotar akana ka astare manušen.“ 11 Ađahar ikalđe o čamcija ki obala, aćhavđe sa hem đelje oleja. 16 A o Isus but putija đelo ko pusta thana te molini pe. 30 Tegani o fariseja hem okola kola penđarđe o Zakon počminđe te prigovorinen e Isusese učenikonenđe: „Sose hana hem pijena okolencar kola tane poreznikija hem grešnikija?“ 31 O Isus odgovorinđa lenđe: „Na valjani lekari okolenđe soj tane saste, nego okolenđe kola tane naborme. 32 Na aljum te vićinav e pravedno manušen te pokajinen pe, nego e grešno manušen.“