Jovan
17 Palo odova so molinđa pe, o Isus vazdinđa pe jaćha premalo nebo hem phenđa: „Mo dad, alo o vreme. Proslavin te ćhave, te šaj to ćhavo te proslavini tut. 2 Dinđan lese pravo te vladini upro sa o manuša, te šaj ov te del večno životi sarinenđe kola dinđan lese. 3 A te šaj te dobinen večno životi, valjani šukar te upoznajinen tut, e jedino ćaćutne Devle, hem okole kas bićhalđan, e Isuse Hriste. 4 Me proslavinđum tut ki phuv, ađahar so đi o krajo ćerđum i buti koja dinđan man. 5 Akana tu, mo Dad, proslavin man: de man te ovav uzo tute hem te ovel man slava koja hine man ked hijum le tuvaja, angleder so ulo o sveto. 6 Objavinđum to anav e manušenđe kolen dinđan man ando sveto. On hine tekle, a tu dinđan len maje, hem on šunđe to lafi. 11 Me više na hijum ko sveto, ama on tane ko sveto, a me avava koro tute. Mo dad, kova hijan sveto, arakh len sebepi to anav, kova dinđan man, te šaj hem on te oven jekh, sar so hem amen hijam jekh. 12 Đi hijum le olencar, me arakhljum len sebepi to anav, kova dinđan man. Štitinđum len hem nijekh olendar nane uništimo osim o ćhavo ando uništenje, te bi ispuninena pe o lafija ando Lil. 14 Me vaćerđum lenđe to lafi, a o sveto mrzinđa len, sose on nane deo ando akava sveto, sar so ni me na hijum deo ando akava sveto. 15 „Na molinava tut te le len ando sveto, nego te arakhe len ando Lošno. 16 On nane deo akale svetoso, sar so me na hijum deo akale svetoso. 17 Te lafeja ćer len te oven sveta, sose to lafi tano ćaćipe. 20 „Na molinava man samo olenđe nego hem aso sa okola kola ka verujinen maje sebepi olenge lafija, 21 te šaj sare te oven ko jekhipe, sar so hijan tu, mo Dad, ko jekhipe mancar hem me ko jekhipe tuvaja, te šaj hem on te oven ko jekhipe amencar, te šaj o sveto te verujini so tu bićhalđan man. 23 Me hijum ko jekhipe olencar hem tu hijan ko jekhipe mancar, te šaj on te oven ko savršeno jekhipe. Ađahar o sveto ka đanel so tu bićhalđan man hem so mangeja olen sar so mangeja man. 24 Mo Dad, mangava okolen kola dinđan man te oven mancar, uduri kaj hijum me, te šaj te dikhen i slava koja dinđan man, sebepi so mangljan man angleder so ulo o sveto. 26 Me objavinđum lenđe to anav hem ponodri ka objavinav le, te šaj o mangipe kova tu mothovđan maje on te mothoven avere manušenđe hem te šaj te ovav ko jekhipe olencar.