Izlazak
32 Ked o narodo dikhlja so but vreme nakhlja, a o Mojsije pana na huljilo andi gora, on ćedinđe pe uzo Aron hem phenđe lese: „Ćer amenđe devel kova ka vodini amen, sose na đanaja so ulo okole Mojsijeja kova ikalđa amen ando Egipat.“ 2 A o Aron phenđa lenđe: „Huljaven o zlatna ćenja ando tumare romnjenge, ćhavenge hem ćhajenge kana, hem anen odova koro mande.“ 3 Celo narodo huljavđa o zlatna ćenja ando pe kana hem anđe len e Aronese. 4 Tegani ov lelja o zlato olendar, oblikujinđa le e alatkaja aso rezbarenje hem ćerđa jekh kip ando telco. A o narodo ko glaso phenđa: „Akava tano to Devel, Izrael, kova ikalđa tut ando Egipat!“ 5 Ked o Aron dikhlja odova, ćerđa jekh oltari anglo telco. Palo odova glasno phenđa: „Tajsa tano praznik e Jehovase!“ 6 Tajsato dive uštilje rano hem počminđe te den žrtve andi paljenica hem žrtve ando zajedništvo. Palo odova o narodo bešlja te hal hem te pijel. Hari palo odova uštilje te zabavinen pe. 7 O Jehova tegani phenđa e Mojsijese: Hulji telje, sose ruminđa pe to narodo kole ikalđan ando Egipat. 8 Sigate irinđe pe kotar drumo kova odredinđum lenđe. Ćerđe pese kip ando telco, klaninena pe olese hem dena lese žrtve, hem phenena: ’Akava tano to Devel, Izrael, kova ikalđa tut ando Egipat.‘“ 33 Ama o Jehova odgovorinđa e Mojsijese: „Okole kova maje grešini, ole ka kosav andi mi knjiga.