Koja tani i šukar vest?

1. Koja tani i šukar vest ando Devel?

O Devel mangela o manuša te uživinen ko đivdipe ki phuv. Ov stvorinđa i phuv hem sa soj tano upro late, odolese so mangela e manušen. Pana hari, ov ka obezbedini jekh pošuži budućnost e manušenđe ki phuv. Ov ka cidel i patnja ando sa o manuša. Čitin Jeremija 29:11.

Nijekh vladavina đi akana na uspinđa te cidel o maribe, o nabormipe ja o meribe. Ama, isi jekh šukar vest. Pana hari, o Devel ka cidel sa o manušikane vladavine hem jedino oleso Kraljevstvo ka vladini. Tegani, o manuša ka uživinen ko mir hem ko šukar sastipe. Čitin Isaija 25:8; 33:24 hem Danilo 2:44.

2. Sose tano važno sare te šunen i šukar vest?

O krajo andi patnja ka ovel ked o Devel ka cidel sa e lošno manušen kotar i phuv (Sofonija 2:3). Ked ka ovel odova? Ko e Devleso Lafi tane proreknime sa o lošna buća kola akana utičinena upro manuša. Sa o lošna buća kola ćerena pe ki phuv mothovena soj tano paše o vreme ked o Devel ka anel o kraj. Čitin 2. Timoteju 3:1-5.

3. So valjani te ćera?

Valjani te sikljova ando Devel hem ando oleso Lafi, i Biblija. Oj tani sar jekh lil ando dad kova mangela amen. Andi Biblija šaj te haljova sar šaj već akana te ovel amen šukar đivdipe hem sar ki budućnost šaj te ovel amen večno đivdipe. Disavenđe verovatno na ka ovel drago so tuće neko pomožini te haljove i Biblija. Ama, ma dozvolin averenđe te obeshrabrinen tut, sose ađićeri tut but šuži budućnost. Čitin Poslovice 29:25 hem Otkrivenje 14:6, 7.