Koj tano o Isus Hrist?

1. Kotar alo o Isus?

Za razliku ando avera manuša, angleder so bijandilo ki phuv, o Isus živinđa ko nebo sar duhovno osoba (Jovan 8:23). Ov hine prvo kas o Devel stvorinđa. O Isus pomožinđa pe Dadese te stvorini sa avera buća. Jedino ole o Jehova direktno stvorinđa hem odolese ov vićini pe „jedinobijando“ ćhavo (Jovan 1:14). O Isus hine vićimo „Lafi“ sose o Devel vaćerđa prekalo leste. Čitin Poslovice 8:22, 23, 30 hem Kološanima 1:15, 16.

2. Sose o Isus alo ki phuv?

O Devel bićhalđa pe Ćhave ki phuv ađahar so prenesinđa oleso đivdipe kotar nebo ko e Marijako vođi. Odolese, e Isuseso dad na hine nijekh manuš ki phuv (Luka 1:30-35). O Isus alo ki phuv (1) te sikavi o ćaćipe ando Devel, (2) te del amenđe primer sar te ćera e Devlesi volja, čak hem ked hijam ko pharipa, (3) hem te del po savršeno đivdipe sar „otkupnina.“ Čitin Matej 20:28.

3. Sose valjani amenđe i otkupnina?

I otkupnina tani cena koja valjani te platini pe te bi otkupini pe nekaso životi ando meribe (Izlazak 21:29, 30). E Devlesi prvobitno namera na hine o manuša te phurjoven hem te meren. Sar đanaja odova? O Devel phenđa e prvone manušese, e Adamese, so ka merel ako ka ćerel greh. Te na ćerel hine o greh, ov niked ne bi merela (Postanak 2:16, 17; 5:5). Sar so phenela i Biblija, sebepi so o Adam grešinđa, o meribe „khuvđa“ ko sveto. Prekalo Adam sa o manuša nasledinđe o greh hem o meribe. Odolese, valjani amenđe i otkupnina te bi oslobodini amen ando meribe kova nasledinđam ando Adam. Čitin Rimljanima 5:12; 6:23.

Ko šajinđa te platini i otkupnina te bi oslobodini amen ando meribe? Ked meraja, amen platinaja i kazna samo aso amare grehija. Nijekh nesavršeno manuš našti te platini i otkupnina aso averenge grehija. Čitin Psalam 49:7-9.

4. Sose o Isus mulo?

O Isus na hine sar amen, ov hine savršeno. Ov na valjanđa te merel sebepi pe grehija, sose ov niked na grešinđa. O Isus mulo sebepi amare grehija. Odoleja so bićhalđa pe Ćhave te merel amenđe, o Devel mothovđa so mangela e manušen. Hem o Isus mothovđa so mangela amen ađahar so hine poslušno pe Dadese hem dinđa po đivdipe aso amare grehija. Čitin Jovan 3:16 hem Rimljanima 5:18, 19.

Dikh o kratko film Sose o Isus mulo?

5. So o Isus ćerela akana?

Đi hine ki phuv, o Isus saćarđa e nabormen, uskrsninđa e mulen hem pomožinđa e manušenđe kola hine len pharipa. Odoleja mothovđa so sa ka ćerel ki budućnost aso manuša kola šunena le (Matej 15:30, 31; Jovan 5:28). Palo e Isuseso meribe, o Devel uskrsninđa le sar duhovno osoba (1. Petrova 3:18). O Isus tegani ađićerđa uzi e Devlesi desno strana, sa đi o Jehova na dinđa le moć te vladini sar Kralj upri celo phuv (Jevrejima 10:12, 13). Akana o Isus vladini sar Kralj ko nebo, a olese učenikija vaćerena odija šukar vest ko celo sveto. Čitin Danilo 7:13, 14 hem Matej 24:14.

Pana hari, o Isus sar Kralj, ka koristini pi moć te cidel sa i patnja hem okolen kola prouzrokujinena la. Sa o manuša kola šunena le hem mothovena vera upro leste ka uživinen ko raj ki phuv. Čitin Psalam 37:9-11.