I Rava garavi e uhoden

Ked o izraelska uhodija alje ki diz Jerihon, on hine ko jekhe romnjako ćher, koja vićinđa pe Rava. O kralj ando Jerihon šunđa odova hem bićhalđa pe vojnikonen ko olako ćher. Oj garavđa odole Izraelcen ko krov hem bićhalđa e vojnikonen te đan ko pogrešno drumo. I Rava phenđa e uhodenđe: „Ka pomožinav tumen, sose đanava so o Jehova tano tumencar hem so tumen ka osvojinen akija phuv. Ama, molinava tumen, obećinen maje so ka spasinen me porodica.“

On phenđe e Ravaće: „Obećinaja tuće so niko ando to ćher na ka ovel povredimo. Mukh ando to đami te visini jekh lolo šelo hem ti porodica ka ovel spasimi.“

I Rava ćhivđa jekh šelo te šaj akala duj Izraelcija te huljen ando đami. On đelje ko planine hem uduri garavđe pe trin dive, a palo odova irinđe pe ko Isus Navin. Tegani, o Izraelcija nakhlje i reka Jordan hem spreminđe pe te osvojinen i hanansko phuv. O Jerihon hine i prvo diz koja osvojinđe. O Jehova phenđa lenđe šov dive po jekh puti te phiren okolo i diz, a o eftato dive te ćeren odova efta putija. Tegani o sveštenikija phudinđe ko šinga, a o vojnikija glasno vićinđe. O zidija ko Jerihon rušinđe pe! Ama e Ravako ćher, iako hine ko odola zidija, na rušinđa pe. I Rava hem olaki porodica spasinđe pe, odolese so hine len poverenje ko Jehova.