O Gedeon pobedinđa e Madijancen

Sar nakhlja o vreme, o Izraelcija palem ćhinavđe te služinen e Jehovase hem počminđe te služinen e hovavne devlenđe. Efta berš o Madijancija ćorđe e Izraelcenge životinjen hem uništinđe sa so hine len sadimo ko njive. O Izraelcija morandilje te našen ando Madijancija hem odolese garavđe pe ko pećine hem ko planine. On molinđe e Jehova te spasini len. Odolese, o Jehova bićhalđa jekhe anđele ko jekh terno ćhavo, kova vićinđa pe Gedeon. O anđeo phenđa lese: „O Jehova birinđa tut te spasine e narodo.“ O Gedeon pućlja: „Sar ka spasinav e Izraelcen? Ko hijum me te ćerav odova?“

O Gedeon manglja te uverini pe so o Jehova ćaće birinđa le. Odolese, ov ćhivđa jekh kotor vuna ki phuv hem phenđa e Jehovase: „Tajsa sabale ako i vuna ka ovel sapani, a i phuv šuki, ka đanav so mangeja me te spasinav e Izraelcen.“ Tajsato dive, i vuna hine but sapani, a i phuv šuki. Ama, o Gedeon rodinđa pana diso ando Jehova. Ov pućlja e Jehova tajsa sabale te ćerel i vuna te ovel šuki, a i phuv sapani. Ađahar hem ulo. Akava uverinđa e Gedeone so o Jehova birinđa le. Odolese, ćedinđa pe vojska te šaj te borinen pe e madijansko vojskaja.

O Jehova phenđa e Gedeonese: „Ka pomožinav e Izraelcenđe te pobedinen. Ama, sebepi so isi but vojnikija, šaj te mislinen so kokri pobedinđen len. Odolese, phen sarinenđe kola darana te đan ćhere.“ Tegani, 22 000 vojnikija đelje pese ćhere, a 10 000 aćhilje. O Jehova pana phenđa: „Pana isi but vojnikija. Igar len ki reka hem phen lenđe te pijen pani. Le tuvaja samo okolen kola tane oprezna đi pijena pani hem dikhena da li avela olengo dušmani.“ Iako samo 300 vojnikija ađahar pilje pani, o Jehova obećinđa so ka pobedinen e madijansko vojska koja hine la 135 000 vojnikija.

Odija rat, o Jehova phenđa e Gedeonese: „Akana napadin e Madijancen.“ O Gedeon dinđa pe manušenđe šinga hem bare khore ano kola hine o baklje. Tegani phenđa lenđe: „Dikhen so me ćerava hem tumen ćeren ađahar.“ Ov phudinđa ki šing, phaglja o khoro, vazdinđa i baklja hem glasno vićinđa: „O mač e Jehovaso hem e Gedeoneso!“ Odmah palo odova, o 300 vojnikija ćerđe isto ađahar. O Madijancija but darandilje hem počminđe te našen ko sa o strane. Odobor hine bunime so počminđe te mudaren pe maškaro peste. O Jehova hem akava puti pomožinđa e Izraelcenđe te pobedinen pe dušmanen.