E Jeftajeso obećanje

O Izraelcija palem mukhlje e Jehova hem počminđe te služinen e hovavne devlenđe. Ked o Amoncija napadinđe e Izraelcen, o hovavne devela naštine te pomožinen lenđe. O Izraelcija but berša patinđe. Ko krajo phenđe e Jehovase: „Grešinđam. Molinaja tut, spasin amen ando amare dušmanija.“ Tegani, o Izraelcija uništinđe pe idolen hem počminđe palem te služinen e Jehovase. Odolese, ov naštine više te dikhel sar patinena.

O Jehova birinđa jekhe vojniko, kova vićinđa pe Jeftaj, te vodini e narodo ko maribe protiv o Amoncija. Ov phenđa e Jehovase: „Ako ka pomožine amen te pobedina ko akava maribe, ked ka irinav man ćhere, i prvo osoba koja ka ikljol anglo mande, ka dav la tuće.“ O Jehova šunđa e Jeftajesi molitva hem pomožinđa lese te pobedini.

O Jeftaj hine le samo jekh ćhaj hem ked irinđa pe ćhere, oj ikljilji anglo leste. Oj ćhelđa hem bašalđa ko daire. Ked o Jeftaj dikhlja la, setinđa pe ko po obećanje hem phenđa laće: „O, mi ćhaj! Morandiljan li prvo tu te ikljove anglo mande? Obećinđum diso e Jehovase hem te šaj te ćerav odova mora te bićhalav tut ko sveto šatori ko Silom.“ Ama, olesi ćhaj phenđa lese: „Mo dad, ako obećinđan diso e Jehovase valjani te ispunine odova. Samo mukh man prvo te đav duj masek ki planina me amalinjencar. A palo odova ka đav ko Silom.“ E Jeftajesi ćhaj verno služinđa ko sveto šatori đi ko krajo ando po životi. Svako berš olake amalinja đelje ko Silom te dikhen la.