O Jehova dinđa snaga e Samsonese

But Izraelcija palem počminđe te služinen e idolenđe hem odolese o Jehova mukhlja o Filistejcija te vladinen upro lende. Ama, hine disave Izraelcija kola manglje e Jehova. Jekh olendar hine o Manoje. Ov hem olesi romni na hine len ćhave. Jekh dive, o Jehova bićhalđa jekhe anđele ki Manojesi romni. O anđeo phenđa laće: „Ka ovel tut ćhavo. Ov ka spasini e Izraelcen ando Filistejcija hem ka ovel nazirej.“ Da li đaneja ko hine o nazireja? On služinđe e Jehovase ko posebno način hem na isminđe te ćhinen pe bala.

Palo disavo vreme, o Manoje dobinđa murše hem ćhivđa leso anav Samson. Ked o Samson barilo, o Jehova dinđa le bari snaga. Ov hine odobor zoralo so jekhvar mudarđa e lave pe vastencar! Ki jekh aver prilika, kokri mudarđa 30 Filistejcen. O Filistejcija mrzinđe le hem rodinđe način te mudaren le. Jekh rat, đi o Samson suća ki Gaza, on đelje anglo dizjake udara hem ađićerđe le odothe te šaj te mudaren le sabale. Ama, ki ekvaš i rat o Samson uštilo, đelo ko dizjake udara hem ikalđa len ando zido. Lelja o udara ko pe pike hem akharđa len upre ki planina paše uzo Hevron!

Hari palo odova, o Filistejcija đelje ki Samsonesi đuvli, i Dalila, hem phenđe laće: „Svako amendar ka del tut but srebrnikija ako saznajinđan sose tano o Samson odobor zoralo. Mangaja te astara le hem te ćhiva le ko phanlipe.“ I Dalila prihvatinđa te ćerel odova, sose manglja te lel o pare. Ki početka, o Samson na manglja te vaćeri sose tano odobor zoralo. Ama, oj stalno pućlja le, sa đi na vaćerđa laće pi tajna. Ov phenđa laće: „Me bala niked na ćhinđum sose me hijum nazireji. Ako ćhinava me bala ka našalav mi snaga.“ O Samson but grešinđa so phenđa laće pi tajna, nane li ađahar?

I Dalila odmah phenđa e Filistejcenđe: „Đanava olesi tajna!“ Palo odova, oj sovljaćerđa e Samsone ki pi angalja hem vićinđa nekas te ćhinen lese bala. I Dalila tegani vićinđa: „Samson, o Filistejcija tane akate!“ Ked o Samson uštilo, na hine le više snaga. O Filistejcija astarđe le, korjaćerđe le hem ćhivđe le ko phanlipe.

Jekh dive, but Filistejcija ćedinđe pe ko hram ando po devel, kova vićinđa pe Dagon. On počminđe te vićinen: „Amaro devel dinđa amen e Samsone! Ikalen e Samsone te asa amenđe oleja!“ On ćhivđe le te terđol maškaro duj stubija hem počminđe te maren lese muj. O Samson vićinđa: „Jehova, molinava tut, de man snaga samo pana jekh puti.“ Đi tegani, e Samsonese bala palem barilje. Ov gurinđa e hramese stubija sa pe snagaja hem celo hram rušinđa pe. Sa o manuša kola hine odothe mulje, ama mulo hem o Samson.