Koj tano o ćaćutno Devel?

O kraljevstvo Izrael hine le deš plemenija. Upro akala deš plemenija vladinđe but lošna kraljija, ama o Ahav hine jekh ando najlošna. Ov lelja pese jekha lošno romnja koja služinđa e Valese. Olako anav hine Jezavelja. O Ahav hem i Jezavelja ćhivđe e manušen te služinen e Valese hem mudarđe bute e Jehovase prorokonen. So ćerđa o Jehova sebepi odova? Ov bićhalđa pe proroko, e Ilija, te phenel diso e Ahavese.

O Ilija phenđa e Ahavese so ko Izrael na ka đal boršim odolese so ov ćerela lošnipe. Pobuter ando trin berš ko njive na barilo ništa hem ki phuv hine baro bokhalipe. Palo odova, o Jehova palem bićhalđa e Ilija ko Ahav. O kralj phenđa: „Tu ćereja amenđe samo problemija! Tu hijan krivo aso sa.“ O Ilija phenđa: „Me na hijum krivo so na đala boršim. Tu hijan krivo sose služineja e Valese. Hajde te dikha koj tano o ćaćutno Devel. Ćede sa e narodo hem e Valese prorokonen ki planina Karmil.“

Ked o manuša ćedinđe pe ki planina, o Ilija phenđa lenđe: „Odlučinen so ka ćeren. Ako tano o Jehova o ćaćutno Devel, služinen olese. A ako tano o Val, tegani služinen olese. Aće so ka ćera. E Valese 450 prorokija neka spreminen pi žrtva hem neka molinen pe devle, a me ka spreminav mi žrtva hem ka molinav me Devle, e Jehova. O Devel kova ka odgovorini e jagaja, ov tano o ćaćutno Devel.“ O manuša složinđe pe odoleja.

E Valese prorokija spreminđe pi žrtva. Celo dive molinđe pe pe devlese: „O Val, šun amen!“ Ama, o Val na odgovorinđa. O Ilija marđa lenđe muj hem phenđa: „Pištinen pobuter. Šaj sovela, pa valjani neko te vazdel le ando sojbe.“ Počminđa te raćol, a e Valese sluge pana vićinđe le. Ama, ov na odgovorinđa lenđe.

O Ilija ćhivđa pi žrtva ko oltari hem ćhorđa pani upro late. Tegani molinđa pe: „O Jehova, molinava tut, mothov lenđe so tu hijan o ćaćutno Devel.“ Ko odova trenutko, o Jehova mukhlja i jag ando nebo hem tharđa i žrtva. O manuša počminđe te pištinen: „O Jehova tano o ćaćutno Devel!“ O Ilija phenđa: „Astaren e Valese prorokonen te na našen!“ Odova dive, sa e Valese 450 prorokija hine mudarde.

Ked jekh tikno oblako pojavinđa pe upro more, o Ilija phenđa e Ahavese: „Ka ovel bari oluja. Uklji ki ti kočija hem đa tuće ćhere.“ O nebo kaljilo, počminđa te phudel bari bavlal hem palo but vreme palem počminđa te perel baro boršim. O Ahav vozinđa i kočija but sigate. Ama, e Jehovase snagaja, o Ilija prastandilo posigate andi kočija! Da li završinđe pe e Ilijase muke? Ka dikha.