E udovicako ćhavo tano palem đivdo

Đi ko Izrael hine šukipe ki phuv, o Jehova phenđa e Ilijase: „Đa ki Sarepta. Uduri jekh udovica ka del tut te ha.“ Ked reslja ko dizjake udara, o Ilija dikhlja jekha ćorore udovica sar ćedela kašta. Tegani, ov rodinđa olatar hari pani. Ked đelji te anel lese, ov vićinđa palo late hem phenđa laće: „Molinava tut, ana maje hem hari maro.“ Ama, oj phenđa lese: „Nane man maro te dav tut. Isi man samo hari varo hem zejtini te ćerav diso me ćhavese hem maje.“ O Ilija phenđa laće: „O Jehova obećinđa so ako dinđan man hari maro, tegani o varo hem o zejtini so isi tut, niked na ka trošinen pe sa đi palem na perela boršim.“

Tegani i udovica đelji ćhere hem ćerđa maro e Jehovase prorokose. Sar so o Jehova obećinđa, ađahar hem ulo. I udovica hem olako ćhavo hine len so te han sa đi na počminđa palem te perel boršim. Sa odova vreme, o ćupija kaj hine o varo hem o zejtini, hine pherde.

Jekh dive, ulo diso but lošno. E udovicako ćhavo but naborsalo hem mulo. I udovica počminđa te molini e Ilija te pomožini laće. O Ilija lelja le ando olake vasta hem legarđa le upre ki soba. Mukhlja le ko kreveti hem počminđa te molini pe: „Jehova, molinava tut, irin akale ćhave ko životi.“ Odova so rodinđa o Ilija hine but čudno. Da li đaneja sose? Odolese so đi tegani niko na uskrsninđa. Ama na samo odova, već akija udovica hem olako ćhavo na hine Izraelcija.

Ipak, o Jehova irinđa akale ćhave ko životi! O Ilija phenđa e udovicaće: „Dikh! To ćhavo tano palem đivdo.“ Oj hine but radosno hem phenđa e Ilijase: „Akana đanava so tu hijan e Devleso manuš. Đanava so vaćereja samo odova so o Jehova phenela tuće.“