E Jehovaso anđeo zaštitinđa e Jezekija

O Asircija osvojinđe o izraelsko kraljevstvo, kova hine le deš plemenija. Akana o Senahirim, o asirsko kralj, manglja te osvojini o kraljevstvo andi Juda, kova hine le duj plemenija. Ov počminđa te osvojini o dizja ki Juda jekh palo jekh. Ando sa o dizja, ov najviše manglja te osvojini o Jerusalim. Ama, ov na đanđa so o Jehova ka zaštitini odija diz.

O Jezekija, o kralj andi Juda, dinđa but pare e Senahirimese te na napadini o Jerusalim. Ama, iako o Senahirim lelja o pare, ov palem bićhalđa pe vojska te napadini o Jerusalim. O manuša uduri but darandilje sose o Asircija hine sa popaše hem popaše. O Jezekija phenđa lenđe: „Ma daran! O Asircija tane zorale, ama o Jehova ka pomožini amen te ova pana pozorale olendar.“

O Senahirim bićhalđa pe glasniko, e ravsake, ko Jerusalim te marel muj e narodose. O ravsak terdilo avri andi diz hem vićinđa: „O Jehova našti te pomožini tumen. Ma mukhen o Jezekija te hovavi tumen. Nane odova devel kova šaj te zaštitini tumen amendar.“

O Jezekija pućlja e Jehova so te ćerel. O Jehova odgovorinđa lese: „Ma dara ando odova so phenela o ravsak. O Senahirim na ka osvojini o Jerusalim.“ Palo odova, o Jezekija dobinđa lila ando Senahirim. Odothe pisinđa: „Predajin tut. O Jehova našti te spasini tut.“ Tegani, o Jezekija molinđa pe: „Jehova, molinava tut, spasin amen, te šaj sare te đanen so samo tu hijan o ćaćutno Devel.“ O Jehova odgovorinđa lese: „O kralj andi Asirija na ka khuvel ko Jerusalim. Me ka zaštitinav mi diz.“

O Senahirim hine sigurno so ka osvojini o Jerusalim. Ama, jekh rat, o Jehova bićhalđa jekhe anđele ko šatorija kuri suće o vojnikija. Akava anđeo mudarđa 185 000 vojnikija! O kralj Senahirim, aćhilo bizo pe najšukar vojnikija hem odolese morandilo te irini pe ćhere. Sar so obećinđa, o Jehova zaštitinđa e Jezekija hem o Jerusalim. Ked bi živineja ko Jerusalim ko odova vreme, da li bi hem tu uzdajineja tut upro Jehova?