O Isus ćerela but čudija

O Isus alo tele ki phuv te propovedini ando Devleso Kraljevstvo. Te šaj te mothovi so ka ćerel jekh dive sar Kralj, o Jehova dinđa le po sveti duh te šaj te ćerel čudija. Ov šaj hine te saćari bilo kova nabormipe. Kuri god đelo, koro leste alje o naborme manuša hem ov saćarđa len. O korore šaj hine te dikhen, o kašuke te šunen hem o sakatija te phiren. Čak, ov ikalđa e demonen ando manuša. Ked bi neko samo pipini olese šeja, šaj hine odmah te saćol. Kuri god đelo, o manuša đelje palo leste. Čak hem ked manglja te ovel kokri, o Isus niked na irinđa po dumo e manušenđe.

Jekh puti, đi o Isus hine ko jekh ćher, o manuša anđe jekhe manuše kova naštine te phirel. Ama, on naštine te legaren e manuše andre ko ćher sose hine but gužva. Odolese ćerđe jekh rupa ko krov te šaj odothar te mukhen le. Tegani o Isus phenđa lese: „Ušti hem phir.“ O manuš uštilo hem o narodo hine oduševimo.

Jekh aver puti, ked o Isus khuvđa ko jekh gav, 10 manuša kola hine len guba terdilje podur olestar hem vićinđe: „Isuse, pomožin amen!“ Ko odova vreme, o gubava manuša na isminđe te aven uzo avera. O Isus phenđa odole manušenđe te đan ko hram, sose premalo e Jehovaso zakon o gubava manuša valjanđe te ćeren odova ked saćona. On pođinđe hem đi pana hine ko drumo, saćilje. Ked haljilo so saćilo, jekh olendar irinđa pe ko Isus te zahvalini pe olese hem te slavini e Devle. Iako saćilje deš đene, samo jekh alo te zahvalini pe e Isusese.

Jekh romni koja hine nabormi 12 berš, dinđa sa so hine la te šaj te saćol. Đi o Isus hine maškaro manuša, oj alji palo leste hem pipinđa o krajo ando oleso fistani. Ko isto trenutko, oj saćilji. Tegani, o Isus pućlja: „Ko pipinđa man?“ I romni darandilji, ama alji anglo leste hem phenđa lese so ćerđa. O Isus utešinđa la hem phenđa laće: „Mi ćhaj, đa hem nek ovel tut mir.“

Jekh važno manuš, kaso anav hine Jair, zamolinđa e Isuse: „Molinava tut, ava koro mande! Mi ćhaj tani but nabormi.“ Ama, i ćhaj mulji angleder so o Isus reslja koro leste. Ked reslja anglo Jaireso ćher, dikhlja sar but manuša rovena pali ćhaj. O Isus phenđa lenđe: „Ma roven, oj samo sovela.“ Tegani dolinđa e ćhaja ando vas hem phenđa: „Ćhaje, ušti!“ E Jairesi ćhaj odmah uštilji. O Isus phenđa olake roditeljenđe te den la diso te hal. Šaj samo te zamisline kobor on hine bahtale!