O Isus saćari ko sabat

O fariseja mrzinđe e Isuse hem rodinđe razlog te astaren le. Odolese on phenđe so na ismini te saćari e nabormen ko sabat. Jekhvar, ko sabat, o Isus dikhlja jekhe korore manuše sar mangela ki ulica. Tegani phenđa pe učenikonenđe: „Dikhen sar e Devlesi sila ka saćari akale manuše.“ Tegani o Isus ćhungarđa ki phuv, kotar odova ćerđa ćik hem odoleja makhlja e manušese jaćha. Palo odova, o Isus phenđa lese: „Đa, thov te jaćha ko jezerce Siloam.“ O manuš ćerđa ađahar hem palo odova prvo puti ko po životi ov šaj hine te dikhel.

O manuša but čudinđe pe. On pućlje pe: „Da li tano akava o manuš kova bešlja hem manglja pare, ili samo izgledini sar oleste?“ Ov phenđa lenđe: „Me hijum odova. Bijandiljum kororo, ama akana dikhava!“ O manuša pućlje le: „A sar šaj akana te dikhe?“ Ked phenđa lenđe so ulo, on igarđe le ko fariseja.

O manuš phenđa e farisejenđe: „O Isus ćhivđa maje ćik ko jaćha hem phenđa manđe te đav te thovav me jaćha. Me ćerđum odova, hem akana dikhava.“ O fariseja phenđe lese: „Ako o Isus saćarđa ko sabat, tegani olesi moć na avela ando Devel.“ Ama, avera phenđe: „Ako olesi moć na avela ando Devel, tegani ov na bi šaj nikas te saćari.“

O fariseja vićinđe e manušese roditeljen hem pućlje len: „Sar šaj tumaro ćhavo akana te dikhel?“ On darandilje sose o fariseja phenđe so svako ko verujini ko Isus ka ovel paldimo andi sinagoga. Odolese phenđe: „Na đanaja. Pućen ole.“ O fariseja pućlje e manuše but buća hem ko krajo ov phenđa lenđe: „Phenđum tumenđe sa so đanava. Sose palem pućena man?“ O fariseja but holjanđe hem paldinđe le.

O Isus arakhlja akale manuše hem pućlja le: „Da li verujineja ko Mesija?“ Ov phenđa: „Ked bi đanava koj tano, bi verujinava ano leste.“ O Isus phenđa lese: „Me hijum o Mesija.“ Kobor hine šukar o Isus! Na samo so saćarđa le, već pomožinđa lese te ovel le vera.